دردشة اطفال

@ ما اسمك.؟
فدوى محمد
@ كيف المدرسة ..؟
عادية وكأنها قربت
@ واذا قريت وش فيها ..؟
ما فيها شيء بس لا تخلص الإجازة
@ بس الإجازة كانت طويلة ..؟
عندك طويلة
@ وعندك بعد..؟
لا أنت ما تدرسين زينا عشان تحسين
@ طيب المدرسة زينه والا لا..؟
زينها تعلمنا وتخلينا نعرف نقرأ ونكتب
@ عربي والا إنجليزي..؟
انا ادرس العربي والانجليزي بس بنت عمي ما تدرس الا العربي
@ ليش ..؟
لان مديرتهم والابلات ما يعرفون يتكلمون الانجليزي
@ انت وش رأيك بالسياسة..؟
احلى شيء فيها اسمها
@ طيب وش معنى السياسه..؟
يعني تأخذين اللي تبينها من غير ضرب
@ وكيف عرفت..؟
ابوي يقولها دايم خذوا فدوى بالسياسة عشان تعطيكم اللي تبون
@ عندك اسم دلع ..؟
ايه.. يدلعوني باسم "فداوي .. تجرح وتداوي"
@ تعرفين معنى اسم دلعك ..؟
اعرف ان معناه حلو وبس
@ هم يدلعونك عشان آخر العنقود يعني اصغر وحده..؟
لا عشاني اكبر وحده
@ طيب تسمحين لي اسويلك اختبار ..؟
يوووه انا ناقصه مادريت انك زي الابله والا كان ماوافقت اسوي حوار معاك
@ انا ابشوف كيفك بالانجليزي ..يمكن تسافرين امريكا والا لندن ؟
طيب خلاص اسألي لا بارك الله في الانجليز واهلها
@ تدرين خلاص ما اني بسألها شكلك زعلت..؟
ما زعلت بس انت شكلك ما تعرفين الانجليزي اصلا
@ الله يسامحك .. لكني ما راح اسألك..؟
بكيفك..!!
@ فدوى وين رحتي بالاجازة ..؟
اماكن واجد زي المنتزهات والملاهي
@ وش رأيك بمنتزهاتنا..؟
مسكينه منتزهانتا ما تشبه "ديزني لاند"
@ شلونك مع الكمبيوتر ..؟
هذا صديقي اعرف له
@ شلون تشتغلين فيه..؟
اكتب به والعب به
@ والانتر نت ..؟
هذا أحلى واحلى
@ طيب وش احلى موقع فيه..؟
"عرائس باربي.."
@ طيب كيفك مع المطبخ..؟
آكل منه ورق العنب والمكرونة بالبشاميل اللي يسونها
@ وانت تعرفين تسوينها..؟
اعرف وش يحطون فيها بس توني على الطباخ..
@ اذا كبرت وش ودك تصيرين..؟
ما ادري يمكن دكتورة ويمكن ابله ويمكن شيء ثاني يطلع جديد اذا كبرت واشغل به
@ طيب وش آخر كلمة تقولينها ..؟
أقول للبنات المدرسة جايه شدوا حيلكم والله معانا