دردشة اطفال

@ وش اسمك؟
* ريان.
@ بس (ريان)؟
* اسمي ريان فهد الظويهر
@ كم عمرك؟
* انت شوف وكم تعطيني.
@ انا اشوف قدامي احلى واصغر نقيب..!!
* ايوه.. لاني احب اصير كذا..
@ طيب.. مين تحب اكثر امك ام ابوك..؟
* احب.. منى.
@ طيب وش الاكله اللي تحبها؟
* احب منى.
@ منى.. منى..! مين هذي..؟
* اختي الحلوة.
@ يعني احلى من بابا وماما..؟
* لا كلهم حلوين ماما سكر.. وبابا عسل.
@ واختك منى؟
* عسل وسكر مع بعض.
@ ريان انت تحب الحيوانات؟
* لا ما احب النملة.
@ والنملة حيوان؟
* ايه حيوان وتخوف.
@ ليش؟
* عشانها تقبصني وتطير عيونها.
@ بس النملة ما هي حيوان انها حشرة..!
* كيفها.
@ انت تروح المدرسة؟
* لا.. ما اروح توني صغير.
@ يعني متى تروح؟
* ابدخل المدرسة بالليل.
@ ماما تقول انك تحب الشنب.. ليه؟
* عشان انا رجال المرأة بس هي اللي مسكينة ما عندها شنب.
@ وش انت تقول انك تحب منى وش الالعاب الي تلعبها؟
* سوني وسيارات وطيارات.
@ ريان ما قلت لي وش تبي تصير اذا كبرت؟
* شرطيا.
@ ليه تبي تصير شرطي؟
* علشان امسك الحرامي اللي سرق الدباب.
@ طيب متى تبي تصير "شرطي"؟
* انا الحين شرطي ويا كبرت ابصير "نقيب".
@ انت تشتغل وتساعد ماما في البيت؟
* ايه دايما.
@ يعني تطبخ.؟
* لا هذا شغل حريم.
@ طيب وش تسوي..؟
* اصلح التليفون.
@ كيف تصلحه؟
* افكه واركبه من جديد وما يشتغل وارجع افكه.
@ تكسره يعني..؟
* لا اصلحه.
@ طيب ريان انت عندك جوال؟
* لابس متكسر.
@ ليه ما تصلحه؟
* ابوي اشتراه خربانا و"منى" كسرته.
@ طيب آخر كلمة وش تقول؟
* اقول سلام عليكم وقولوا يا رب ريان يكبر ويصير "شرطي" يحرس الديرة من الحرامية.