دردشة اطفال

@ ما اسمك؟
* فهودي.
@ فهد والا فهودي؟
* فهد فهودي كذا ينادوني.
@ طيب كم عمرك؟
* سنة واحدة.
@ يعني مرة صغير ما نقدر نسولف معاك؟
* لا اقدر عمري ثلاثة وربع.
@ وش اكثر شيء تحبه؟
* ماما وبابا.
@ كل الناس يحبون بابا وماما.. وشتحب تلعب؟
* كورنيش.
@ هذي لعبة والا ايش؟
* لا عند البحر.
@ اييه تقصد الكورنيش.. لما تروح له وش تسوي؟
* العب مع كل الناس.
@ كل اللي يمشون بالكورنيش تلعب معهم وش تلعب؟
* ايه كلهم العب كورة مع الهنود الصغار والمصريين بس الهنود ما يعرفون وش اقول.
@ شلون عرفت؟
* اقولهم العب معاكم والا تعالوا نتسابق يقولون باااجاه.
@ طيب وش اكثر الحيوانات تحب؟
* في الكورنيش.. القطاوة حلوة مرة تلعب وتلحق الحشرات بعد تلعب معانا وسط المزرعة.
@ سمعت ماما تقول انك تحب الاسد؟
* ايه احب الاسد والحمار.. الاسد شعره حلو.
@ بس الاسد ما يأكل الصغار؟
* لا ياكل اللحم الاحمر انا ولا مرة شفته يأكل الصغار.
@ انت شفته..؟
* ايه في حديقة الحيوان بالقفص الحديدي.
@ شفت انه ياكل الصغار علشان كذا يحطونه بالقفص.. صح؟
* لا يحطون عشان ما ينحاش.
@ طيب.. والحمار ليش تحبه..؟
* عشانه حمار.
@ فهودي لما تكبر وش ودك تشتغل؟
* في البحر اسبح واطلع الكورنيش.
@ ولما تصير عندك فلوس واجد وش تبي تسوي فيها؟
* بحر،، عشان انا قلت لامي اشتري لي البحر قالت بعدين.
@ طيب الناس تحب الفلوس ليش؟
* عشانها اوراق ذهبيه تجيب كل شيء فيها.
@ تعرف وش معنى خارطة الطريق..؟
* الطريق.. يعني الشارع المخطط.
@ تحب الدكتور؟
* لا.. عشان بطقني بالابرة.
@ من تلعب معاه؟
* مع امي وابوي واخواني وشيخة هي اللي تجيني وتحب تلعب معاي.
@ تسوق سيارة والا سيكل؟
* لا.. بس ابتعلم اول اسوق السيارة ام عصى بعدين اتعلم السيكل زي الاطفال اللي بالكورنيش عندهم سياكل.
@ فهد.. انت تروح المدرسة؟
* ما اعرفها.
@ ومتى تعرفها؟
* اذا كبرت وصرت مرة طويل.
@ تحب تلعب مع البنات ولا الاولاد؟
* البنات زي الاولاد كلهم حلوين بس الاولاد احلى لانهم رجال.
@ تحب التليفزيون؟
* ايه اطلع الاغاني اللي فيها يرقصون زي عروس البنات.
@ تحب تروح الملاهي ولا الكورنيش؟
* الملاهي حلوة بس الكورنيش احلى.
@ طيب يا ابو الفهود.. وش آخر شيء تقوله لنا؟
* اقول سلام عليكم ولا تنسوا خليهم يشترون لي البحر.