تخاريف أبو العريف...!!

أبو العريف اشلونك؟
اتحاد يونايتد, ولا بلاش, حتى الطليان قالوا مثل هالمهرجان اللي عملوه الاتحاد ما شافوا في حياتهم, مهرجان يهوس ويجنن.
@ علشان كده صار اتحاد يونايتد؟
لا ياخوي من قبل وهو الاتحاد يونايتد نجوم وبطولات وبعد كومة فلوس.
@ يقولون اللي عنده قرش هالايام يساوي قرش؟
بس الاتحاد عنده قرش وعنده بطولات وعنده البلوي اللي سوا الهوايل.
@ ابو العريف أشوف علاقة الاتحاد مع الهلال زانت؟
شفت كيف, زانت وايد, بس على الله ما تخرب مع الطرف الثاني..!!
@أبو العريف إيش سالفة الاتفاق؟
وعند هلال الطويرقي الخبر اليقين.
@ الزبدة؟
المهم يصير فريقا محترما في الدوري, ويبدأ الاعداد الطيب لمسابقة كأس سمو ولي العهد, وأنا متفائل انه بيصير أسدا.
@ يعني نقدر نقول ان القادسية هو ممثل الشرقية في الدوري؟
طبيعي فريق يضم نجوما كبارا, بس الله يهديه هالمدرب كل يوم ودخل في مشاكل مع الصحافة, تراه نقرأ له إن الصحافة السعودية سيئة, وتراه يقول ان شوشان كذاب وبيرفع شكوى ل(الفيفا) لو يتفرغ لفريقه ويترك هالامور كان الفريق بخير.
@ بس يقولون ان شوشان والدته مريضة وبيعود بعد ما تطيب؟
هذا الكلام من اللي خبرك فيه, وبعدين يبون يرفعون شكوى ل(الفيفا) ضده.. عاشت المصداقية, وعاشت الصراحة..!
@ يعني مو صحيح ان والدته مريضة؟
السالفة ان (الميدان) كتب خبر ان شوشان هرب ولن يعود, قام اللي خبرك فيه طلع فيه وصرح للصحف ان هذا كذب وافتراء وحش في (الميدان) والنهاية يبون يرفعون قضية ضد شوشان, طيب الميدان قال لكم من البداية خرج ولن يعود, ليش تحرجون انفسكم وتطلعون فيها, اعترفوا ان الميدان خبره صحيح 100%.
@ ابو العريف ياسر القحطاني يقول انها صناعة كابرالية, وان الميدان ساهم في نتائج القادسية الايجابية, ولكن بعض القدساويين يقول عكس ذلك, مين فيهم تصدق؟
الحقيقة واضحة مثل عين الشمس, والبعض يريد ان يحجب الشمس بغربال.. كفاية عناد..!!
@ (مشتاق لك بالحيل, شوق الظما للسيل) اغنية جميلة ابو العريف كل يوم اسمعها؟
مثل الخلجاويين كل مباراة يحلمون بالاضواء لان الظما ما وصل للسيل, والله يساعد هالجماهير اللي دائما تغني, ولكن نهاية الاغنية عادة ما تكون مثل اغنية عبدالحليم حافظ رميت الورد طفيت الشمع يا حبيبي.
@ يقولون إن رابطة مشجعي الخليج شجعت القادسية ضد الأهلي؟
بس مش بالأجرة, ويمكن يكون من زود حبهم في الاهلي..!! لان جمهور الخليج يحب الأهلي وايد..!!
@ يقولون من أجل عيون هاني السالم؟
هذي فاتتني..!!