يقولون نايف مات

يضيق الوجود ويتّسع للحزن شريان
وتبدأ مُعاناة الشعور الحقيقيّه
ترادم على جرد المشاعر مزون أحزان
تصب الألم فوق القلوب الشقاويّه
وإذا سالت فياض المحاني مع الوديان
يحير الشعر بين الحروف الهجائيّه
ولو هي على نظم القوافي مع الأوزان
رقينا بهن فوق النجوم السماويّه
ولكنّها قصّة فجيعه تهزّ أوطان
ألا ليتها تطلع حلوم ٍ مسائيّه
يقولون نايف مات وآقول مات إنسان
ولكن بقى نايف على أرض السعوديّه
مدام الأمن نايف ولازال حتى الآن
إذاً كيف أبكتب في وفاته رثائيّه؟
سليل الفخر راس الأمن قايد الشجعان
بعيد المدى راع الوصوف الخياليّه
مؤسس قواعد أمننا بأول الأزمان
مدمّر فلول القاعده معلن الهيّه
دعم هيئة المعروف وأرسى لها الأركان
عطاهم على درء المفاسد صلاحيّه
وقف للمواطن وقفة أخوان عند أخوان
عن حياضهم دافع بسرّ وعلانيّه
كريمٍ يجود بكل جوده بلا نقصان
وكفّه على جزل العطايا رهاويّه
وإذا كان فعلا مات أنا آقول مات إنسان
ولكن بقت روحه من أفعاله الحيّه
ترا اللي رزقه الله من سلالته عقبان
على خطاه مايخطون والنيّه النيّه
فلا يُعتبر ميّت ولو واروا الجثمان
ظلام الثرى وأضحت لياليه منسيّه
لأنّه مورّث دار ومورّثٍ أوطان
على حكمته تُبنى دراسات دوليّه
ودام العوض بولاية العهد في سلمان
شؤون الأمن ياموطني فيك مقضيّه
عسى الله يديم العزّ في ديرة الشجعان
ويرفع مكانة نايف ويغفر السيّه