عواكيس

* عزيزي معوكس رسالة عاجلة مني أدري انك زعلان علشان خسارة الاخضر من قطر لكن هاردك لنا جميعا وودي تقول لي وش الحل ابوالعواكيس؟
محمد السعيد - الرياض
- الحل بالحل الله يحللك ويبيحك يابوسعيد!
* صاحب المليون رسالة ابوالعواكيس
تحية طيبة وبعد:
ياخي مايصير تطول علينا كذا كل مرة إجازة وكل دورة تغيب وحنا الضحية عطني رقم جوال المسؤول اقنعه ان زاويتك لها شعبية مايتوقعها وإن القراء كل سبت انتظار وترقب لذباتك وخفة دمك
بندر العصاي - عنيزة
- عطني المحبة كل المحبة كل الحنان احسن لك بس
* قاهرهم وحابس دمهم معوكس
تحية طيبة وبعد:
والنهاية مع ذا اللي فشلونا في البرامج الفضائية ما غير يهايطون وكله تعصب وماهمهم إلا أنديتهم وليه ماضموا هذا او ذاك والضيوف ما غير يضحكون علينا
أحمد الحمد - بريدة
- شوية يضحكون الا فطسوا من الضحك على عقليات الله يخلف عليها!
* الناقد الساخر معوكس
تحية طيبة وبعد:
بصراحة عطني رأيك في مستوى الحارس العملاق وليد عبدالله وماهي أسباب ولوج هدفي قطر في مرماه
خالد الناصر-المجمعة
- وليد كان مشغول باخويانه خاصة ابوالجوهرة!
* عزيزي معوكس
تحية طيبة وبعد:
وش قصة اللاعب الكويتي عبدالله وبران ما غير يهاجم اتحاد الكرة والمنتخب شكله فاضي وماعنده شغل
طلال علي - جدة
- ماعنده شغل ونسى ان ابو خمسة اهم !
* الحبيب الغالي عكوسي
تحية طيبة وبعد:
بما أنك ناقد رياضي ليه المهاجم سالم الدوسري مايرفع رأسه وهو ماشي بالكورة حرام مايستغل موهبته والله حرام
سالم سلطان-الدمام
- إن رفع راسه قالوا متكبر نيمار!
* هلا ابوالعواكيس بربك بنشوفك ذا السبوع طولت الغيبة ومن طول الغيبات جاب الغنايم ياصديقي.
حمدالدوسري - ابومبارك- العزيزية
- وانت الصادق جاب الضبان من سوق الحمام!
* عزيزي معوكس
تحية طيبة وبعد:
تتوقع اتحاد الكرة يلغون عقد المدرب الأسباني لوبيز ولا يعطونه فرصة تكون آخر فرصة.
نواف المطيري - حي السلام
- ولا حتى فادز وسيتي بلازا!
* الخبير ابوالعواكيس
تحية طيبة وبعد:
وش قصة محترف الهلال البرازيلي نيفيز ماغير يغرد ويلمح أنه ماوده يستمر شكله شبع وقلب على الهلال ولا انا غلطان.
نواف الصيخان - حي الفلاح
- لا بالله ما نتب غلطان وان بغى يروح مع الشمس بخمس ودربه خضر لساوبالو وفلامنجو!
* العزيز الاشهر والاملح معوكس
تحية وبعد:
متى نشوفك محلل في البرامج الرياضية بدل بربسة ذا المشجعين اللي حولتها لمسلسلات فكاهية كنها درب الزلق والحيالة.
جمال الحمد - المدينه المنورة
- وانت وش حارق رزقك خل المشاهد يستانس ويطقطق على عيد بن شاكر وربعه!
* عزيزي معوكس
بعد التحية والتقدير:
من يتحمل نكسات المنتخب السعودي واللي آخرها الخسارة امام منتخب قطر وضياع كاس خليجي 22.
وليد الشهري - النماص
- ما غيره اتحاد الكرة اللي وسع صدره على لوبيز آلين جاب العيد!
* الناقد الكبير معوكس
تحية طيبة وبعد:
أشوف أسامة وعمر هوساوي ماكانوا بالفورمة قدام قطر كرتين ثابتين وهدفين وين التغطية .. وين المشاركة وش برايك كنهم.
رياض العبدالله -الخرج
- كنهم شبكة الجوال وإن الدفاع الذي طلبت لا يمكن الاتصال به!
* عزيزي معوكس
تحية طيبة وبعد:
كان انك شجاع ولا متعصب لفريقك أنشر سؤالي ليه لوبيز ما ضم السهلاوي والراهب وغالب وابوعمر وشراحيلي صدقني لوضمهم جبنا الكاس بالراحة.
عاشق العالمي - راكان الصالح -القصيم
- بعد كم شهر نبيك تجيب الكاس بالراحة مافات شي يابوصالح!
*عزيزي معوكس
تحية طيبة وبعد:
وش رايك في قرارات الإيقاف ضد بعض الإداريين ما تشوف أنها قاسية ومتى تتوقع العفو عنهم؟
أحمد الجربوع-القصيم
- بعد مضي نصف المدة!
*الصديق الغالي ابوالعواكيس ماذا تتوقع لكلاسيكو الاتحاد والهلال
مازن بخاري - جدة
- عشر بيانات في حال خسارة طرف!
* خفيف الدم معوكس شكلك مارحت استراحة الإعلاميين في خليجي 22 يعني مادعوك ولا فيه سبب آخر.
بدر الشمري - حائل
_ مالي في البلوت!
سالم الدوسري