يرحم الله من بنا للدار صيت

من رياض المجد من مجده ربيت
وانتهض روحي على شمسه وماه
من رياض المجد من قصره حبيت
وانفطم قلبي على صافي هواه
ما ينسيني زماني لو نسيت
كيف ينسى الطفل حضن اللي رعاه
ابتديت وفي تحت ظله مشيت
وارتوى قلبي بحبه واحتساه
في ربوعه طابت ايام قضيت
وفي ربوعه صوت ابن ماجد علاه
في لياليه طربت وكم لهيت
وفي شروقه تشرق اعيادي معاه
باني حبه بقلبي الف بيت
وقبل حبي حب ابو تركي كساه
يوم عن الجيش والمضماي هيت
وارتفع صوت الحكم نجد خذاه
بشرك بالخير يا نجد وليت
من هل العوجاء حكام ولاه
من عقب يا نجد شرك ما يبيت
دارت الايام لك عز ورخاه
من جديد بالشريعه ابتديت
واشرق التوحيد يوضي بك سناه
عزة الإسلام يا نجد اعتليت
من عزيز عز دينه واحتماه
الفخر يا نجد يوم انك حظيت
بالامام اللي رفع مجدك لواه
ما رضى الا عقب مرضاك ورضيت
بالكتاب وبالشريعه والقضاه
يرحم الله من بنا للدار صيت
وطيب الله نجد من باقي ثراه
فلاح بن نادر آل رشيد