شد الحزام

وطش كثر البهاذيل
مال الزعل في رحلة العمر داعي
دوك النصيحه والدعاوي تساهيل
نصيحةٍ من شاعري اقتناعي
من عاملك بالطيب ارك المعاميل
وسقله من دلالك بزين الطباعي
قدم له من الطيب كثر ازرق النيل
وبحر كما الربان وطو الشراعي
وطيور زاجل يحملنّ المراسيل
لين الخبر بين الجزيره يشاعي
خلك قوينٍ صارمنٍ شامخ مهيل
لا تنحني للوقت وسط الوساعي
والثانيه دوك الخبر با التفاصيل
علم ٍ على بيض الصحايف يذاعي
من شاب شيبته علوم وغرابيل
راع الردى خلك منه دوم واعي
لوهو تردى فيك في صبحٍ وليل
لاتلتفت له يا الكريم الشجاعي
وحذراك تتبع مقفين بارد الحيل
من يتبع المقفي حياته ضياعي
وحذراك من رفقة دشيرٍ مهابيل
للمهزله والضحك ناس ٍ وجاعي
وحذراك من نجس ٍيضويك للويل
هذاه حرصه كيف يلوي ذراعي
وتلقا رفيقك في الليالي المقابيل
لابد مايجلا الظلام الشعاعي
دنياك لاتغرك وكثر الاقاويل
مهما صفتلك لازم إلها خداعي
العمر فاني والتجارب محاصيل
والسم وسط انياب هاك الافاعي
وتذاكر الدنيا تبا تحط وتشيل
ورخصة مسير الشخص فيها انقطاعي
محمد بن زايد الحزيمي