اللغز

كان كاتب اللغز الماضي الشاعر علي الرشيد من رياض الخبراء ويقول:
انشدك عن عدة عيال مسمين
وايضا لهم اخت لها زود تكريم
اعمارهم متساوية يافهيمين
من بينهم ياتي بنات مجاهيم
وقد توصل للحل شعرا:
يامرحبا بك عد نبت البستاتين
وتحية لاهل الخزامى وتكريم
سبت واحد من بعدهم يوم الاثنين
واللي بقي مع الليال المجاهيم
محمد ابودحيم - البدائع
اهلا وسهلا عد رمل الاراضين
وعداد ماينزل من الوبل والديم
اللغز حله ياصلك ضمن بيتين
ايام اسبوع على العد والتيم
طلال الرشيد - الجبيل
يامرحبا تعداد ورد البساتين
واعداد مايضفي من السحب والغيم
اللغز حله واضح للفهيمين
واسبوع والجمعه له زود تكريم
فالح غازي الحربي - رياض الخبراء
تسلم يمين اللي كتب صيغته زين
لغزه مميز عند لجنه وتحكيم
اخو الاحد والسبت هو يوم الاثنين
وسود الليالي دونت بالتقاويم
شلاش بن بلال العنزي
يامرحبا حاضر بحاضر ملايين
اللغز وارد ما يبي زود تنجيم
خمسٍ نداومها ونرتاح يومين
و للبنت نلبس من زيان الهناديم
سالم البشري/ الجبيل
في أسبوعنا سته مهمين
بس الجمعه لها زود تعظيم
هذا هوالحل من غير تخمين
صحيح وان تاهت مفاهيم
عبداللطيف الحُمَيَّانِي / عنيزة
يابو الرشيداللغز من مطلعه زين
ترى العيال اسبوع من دون تقسيم
البنت جمعه بينه للفطينن
ليلة فرح فيها يجون المعازيم
سعد صنهات السهلي/ الدرعية
يا مرحبا ترحيب غالي بغالين
باللي كتب لغزه تحيه وتسليم
أسبوع وايامه وبالرد وافيين
جبنا جواب اللغز من دون تعليم
عبدالله الاطرش-الرس
يا مرحبا اعداد ما تبصر العين
واعداد اكرام العرب للمعازيم
للي كتب اللغز من بين قوسين
ايام اسبوع وليلها دون ترهيم
عبيدالله الحربي/ من عنيزة
الحل واضح مايبي زود تخمين
محبوك بالمعنى علي خير تصميم
السبت مع الأحد واليوم الاثنين
وصلاة الجمعة ركعتين بتسليم
صالح المزيني
حبيت حل اللغز واشارك بيتين
وقًول بسم الله قبل السين والجيم
أيام الأسبوع تجري يابو حسين
ولخطبة الجمعة ننصتلها بتعليم
صالح المحارب
يامرحبا بأهل الوفاء والوفيين
أهل الخزامى والقلوب المفاهيم
لغز الرشيد أيام وشهور وسنين
أيام حله يالقروم الشغاميم
عبدالمحسن بن محمد المحيسن
/رياض الخبراء
للغز رمعة واضحه دون تخمين
اللغز وارد مايبي زود تقيم
ايام اسبوع وجمعة للفهيمين
وسود الليالي شبهة بالمجاهيم
خليف فهيد الحربي /الرياض
اللغز حله يابن ربع ميامين
ايام الأسبوع العيال أو مجاهيم
والاخت جمعه جامعة للمصلين
للغز داخلي وحسب المفاهيم
اسيل سعود الحربي - القاهرة
سلام مني الرجال الميامين
ومني لهم كل المحبه وتكريم
والحل نذره للخزامى بالاثنين
اسبوع حله بكل قوة وتصميم
راضي علي المطرفي - الخرج
يا بو رشيد اللغز مافيه تخمين
السبت والأحد وباقي المقاديم
والجمعه تجمعنا جميع المصلين
وسود الليالي ما تخيف الشغاميم
علي الزولاني الفيفي - بيشة
لغز الأسبوع
يكتبه هذا اليوم الشاعر مقرن بن متعب الهرف من الرياض ويقول:
أنا بنشدك عن بنتٍ مع الرجّال محبوسه
صغيره دامها وسطه كبيره لا ضهرت منّه
على من هو لبسها يتّبع خطوات مدروسه
يجوّد في عنان البنت فاهم شكله وفنّه
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة وننوه بعدم المشاركة الازدواجية بين اللغز وصوت الصورة واختيار احدى الزاويتين.