الغربة

وينك تشوف البعد ياقرة العين
ويشهو عمل بي بعدكم يا حياتي
شربي مرار ومطعمي يا هلي شين
وإن نمت أفرز ما هجاني سباتي
اخفي دموع العين عن من يلاقين
والعبرة بصدري اتجرح شراتي
احس يا ابراهيم مثل السكاكين
بالصدر من بعد الأهل ياغناتي
وأحس يا إبراهيم بالقلب جرحين
جرح الوله والجرح الآخر بذاتي
محدٍ مسليني ولا أحداً مصافين
إلا حليلي يانديمي شفاتي
الهند وأهله مابها من يداوين
إلا شرف كحلي وفيها مراتي
فيها تشوف العين ويفرق البين
فيها لحن روحي وفيها غناتي
بالهند لوغنيت ماحد مغنين
حتى ولو ونيت مالي محاتي
إلا رفيق خطو مره يواسين
اشكي له الغربة ويشكي سواتي
يبكي لي أحبابه وعنهم يحاكين
وابكي له احبابي وتبرد صفاتي
وينك تشوف البعد يا قرة العين
ويشهو عمل بي بعدكم يا حياتي