صوت الصورة

ياشايل حوارٍ على غارب الجمس
ياما على غارب جملنا حملنا
وشلون صرنا اليوم وش حالنا أمس
صار الفضا عقب الفيافي أملنا
تلقى مزاج حوارهم أنعمس عمس
ولو نقدر نفكه فخيرٍ عملنا
عبدالله المحسن - حائل
خاطرت يا راعي الصالون
على القلص محملٍ حاشي
ممشاك خلّه يجي بالهون
لا تجيب حادث على الماشي
حمله ثقيلٍ على البالون
لو أنطلق هج .. وانحاشي
سعود عبدالعزيز الهزاع - نعام
راعي الصالون أركد ثم هدي
أنتبه من ساهر يصيد الحويّر
واضعه فالخلف تمويه وتحدي
مادرى إنه صوره هو والبعيّر
عبده أحمد شمري - الخرج
يا بو خزيم جعلك تعيش مرتاح
أتحفتنا بالمنظر اللي نشوفه
منظر جمل محملينه وﻻ طاح
شاله بقلصه ما تونا ضروفه
الله يفكه من هوا صلف الأرياح
والله يفكه لو تكرر وقوفه
حمد عبدالله الوايلي - حوطة سدير
يا حنتي حنت المكتوف
ما عاد له حيلٍ ولا قوّه
يوم البراري ترانا أوقوف
تاكل من العشب والحوَّه
عبدالكريم عبدالرحمن السلّوم - القرائن
هذي طريقة ما بها خير يا ناس
لابد نشفق وأنتم اليوم تدرون
هذي فعايل صاحبه ما بها إحساس
بهيمةٍ مسكينةٍ كيف ترضون
وهذي رسالة مرسلة وسط قرطاس
يرحم نفوسٍ خلفها اليوم يمشون
محمد عبدالعزيز الخنيفر - أشيقر
يا سايق الجمس المجهز وماشي
على المهل مشيك وخلك على إيمين
وخل عينك بالمرايه على الحاشي
حتى ولو وسط القنص مربطه زين
وحط القفص بعدين وسط القرارشي
حتى يجيله لازمٍ لو بعد حين
صوره فريده ما تبا جدال ونقاشي
وللي بعثها كل قدرٍ وتثمين..
سعود عائش الحربي - القاهرة
تسلم يمين اللي بدع صنعة الشبك
حطه ورا الموتر لزود المقاضي
وراعي اليوكن حمل الحاشي وعجبك
عانيه أو كشته باحدى الفياضي
بعض الرجال يا حي والله يطربك
فعله عظيم ولا عليه اعتراضي
خالد بن ناصر المخيمر - روضة سدير
ليه يا عبدالكريم أبن خزيم
يوم شلته ليه ما ستأجرت دنّا
للطريق اللي يوصّل للمخيم
به عقوم وبه حفور يحفرنّا
له سنينٍ طول وأوظاعه تقيم
بين هات وبين اخذوا لأنّا
بدر الحزيمي
هذا الجمل ما هو مكانه يالأجواد
بهيمةٍ مسكين ما ترحمونه
وش موقفك لو طاح قدام الأشهاد
هذا الخطر يا ناس لا تصنعونه
الرحمة الرحمة ترى الخير يزداد
هذي سلومٍ مخطرة تتبعونه
ريان محمد الخنيفر - الرياض
يا شايل الحاشي على فوق صندوق
أنا أشهد إن الشبك هذا مقاسك
لله درّك يوم شلته معك فوق
ريّحت حاشيكم .. وريّحت رأسك
فكرة جميلة وأعجبتني وهي ذوق
يا قوّ عزمٍ لك .. ويا قوّ باسك
عثمان إبراهيم الرشيد - الرياض
يا ابن خزيم وش المزيون؟
بالله من اية يجيبونه
يبيشيلونه على الصالون
وعلى الزباين يبيعونه
الظاهر إن قيمته مليون
يبين من الرأس وعيونه
شجعان سعود المقاطي - الرياض
لا تقني الخلفه وتجهل بالسلوم
أحوارها ما بين نارٍ والخطر
صاحب خبيرٍ بالحلال وبالعلوم
من قبل تشتال الحوير بالشفر
بالبقس لا تقرب نفود ولا حزوم
ازمالة الأطفال وأهلك بالسفر
أحمد السمحان - الزلفي
صورة العدد