عواكيس

* الحبيب معوكس اقترح اذا كان عندك ظهر قوي والا قريب انضمامك الى لجنة الحكام والعمل معها على تعديل الحال المائل للتحكيم؟
راشد الدوسري- الخبر
- تنشد عن الحال هذا هو الحال من جرف لدحديرة وطلعة القدية!
* الاستاذ معوكس ما تتفق معي ان رعاية الشباب رايح تسدد ديون جميع الاندية بعد مبادرتها في العمل على اسقاط ديون نادي الاتحاد؟
يوسف العمر- الرياض
- اللي بينها وبينها «صلة» رحم وقرابة!
* الصديق العزيز ابو العواكيس معقولة بس اربعة اندية ضمنت البقاء والبقية مهددين بالهبوط.. وين قوة الدوري والاثارة وتقارب المستويات وارتفاع الاداء اللي يقولون عنه؟
سعد الشهراني- خميس مشيط
-عزالله ماعندنا دوري ولانجوم والدعوى خيقي بيقي!
* الى الخبير في الاعلام معوكس معقولة اللي متعصبين هم اللي يحاضرون عن التعصب.. لا لا لا ماني مصدق.. صراحة بعض الندوات دعوة الى التعصب وليس لنبذه والدليل بعض الحاضرين؟
خالد الرشيد- الدمام
- شكل ذا الندوات تدعو للتعصب والحضور ياغافلين لكم الله!
* صديق الجميع معوكس ماهي نصيحتك لنواف العابد بعد ما هبط مستواه.. وماذا تفهم من صمت الادارة على تجاوزات البعض ضد النادي ومنسوبيه.. شكل عندهم مفاجأة؟
حمود الدهمشي- تبوك
- اما مفاجأه كثر منها ومااطولك ياليل!
* البروفسور ابو العواكيس معقولة فيه تصويت على ابعاد لجنة الحكام وجلب خبراء اجانب وعرب لتطوير التحكيم؟ اذا الخبر صحيح اقترح ان تكون انت المتحدث الرسمي باسم التحكيم؟
بندر العمري- الرياض
- كانه صحيح ومشى ابوعزوز أعتزل كولينا ورافشان الاوزبكي!
* صاحب العلاقات القوية معوكس: ماذا تتوقع للزلفي في مباراة دور ال16 من كأس الملك.. انا اتوقع ان يكون هناك مفاجأة من العيار الثقيل؟
عبدالله عمر- جدة
- وانا أتوقع يعسكر الفريق في بلد اوربي او يقلبها كشته في نفود الثويرات!
* ماهي أراؤك يامعوكس ببعض الاستفتاءات احس انه متفق عليها.. والا معقولة ان المتعصب يصير غير متعصب.. واللي يرفع شعار الحياد هو المتعصب؟ .. اشعر ان اللي سوا الاستفتاء مايعرف اللي صاير بالبلد ومايشوف اللي يطرح ويمكن انه جاي من كوكب اخر؟
خالد الدوسري- الافلاج
- كوكب ولا الشعله زمن رياضي أغبر وبس!
* من برايك يامعوكس يتحمل مايحدث في الهلال.. وشلون الادارة ساكتة عن اللي جالس يصير.. ووين اعضاء الشرف اللي هم قوة الهلال؟
عبدالعزيز السعيد- الرياض
-اصلا هو فيه إداره الله يرحم الحال!
* قاهرهم وحابس دمهم ابوالعواكيس وش رايك في أحد رموز التعصب اللي هاجم أساتذته الكبار في أحد البرامج وقال إنهم كانوا وكانوا وأنهم كرسوا التعصب وماكرسه والله غيره هوو نظاراته البشاور (غوار الطوشه)؟
محمد ابراهيم-جدة
- لاتلومه يبي ينعرف ولاأحدن درى عنه اللي في الظلام يغمز !
* صاحب المليون رساله ابوالعواكيس أنا اللي أبي أفهمه وأنا اولا أعشق عميد الاندية الاتحاد ليه هالفزعه من بعض الناس وخذ ياشطب كلها ماجت مع أدارة المثالي محمد فايز ولا الدعوى كانت معاهم ..معاهم من أول آلين راح الفايز والهدف تطيير ريس وجلب غيره من الاصدقاء تكفى فهمني يافهيم..
علي هزازي- الكندرة
- شكلك فاهمها يابوحسين ولايحتاج أزيد وأقول الدنيا مصالح و»صلة» ومحبه والهوى غلاب!
*الاملح والظريف خفيف الدم معوكس ياخي والله أنا مقهور من نتائج عشقي الزعيم وش ذا التخبط الاداري وليه مبقين كاستيلو وهو فاشل وش همهم؟
بندر العصاي
-عنيزه
-همهم الاستثمار في كأس العالم 2014 لعل وعسى البيعه مربحة والفريق وجمهوره بالطقاق!
*عزيزي معوكس اللي يهجرك ولايرد عليك ولا يقفل جواله حتى لو أنه عزيز وش تقول له..
عاشقة الموج الازرق
- أقوله مع الشمس بخمس وأسحب عليه آن فلو وحضر في الواتس!