بيت وصدى

كان بيت الأسبوع الماضي للشاعر عبيد عبدالله القحطان من الجوف والذي يقول:
ياما حلا .. ياما حلا شبّة النار
في خايعٍ توّه مع الصبح ممطور
وكان صدى البيت من الشعراء:
مع رفقةٍ تنسيك ضيقك والاكدار
رك الدلال وزد عليها من بهار
وخير يقدم من حلا الفال ميسور
مع النشاما كلهم طيب واخيار
سوالف تبدي الى طلت النور
مابينهم غطو وﻻ فيه اسرار
والكل منهم مبتهج ثم مسرور
حمد عبدالله الوايلي/حوطة سدير
يا زين شب النار في وقت الاسحار
عقب صلاة الفجر مع فجت النور
برضً قفر فيها الخزامى والاصفار
فيها الشمطري والنفل زاد بزهور
في موقعً بضبط شمال سنار
يوجد شمال شوى عن خشم اباء القور
سعد صنهات السهلي/ الدرعية
لاطبه الشاوي ولاجاه مرار
ريح الخزامى والنفل وسطه يثور
مع رفقة رجال(ن) لهم بالوفا كار
تسعد بمجلسهم على شعة النور
واربع دلال(ن) كلها بن وبهار
وخلاص من سوق الحسى جاك بالفور
عبدالكريم بن خزيم / البكيرية
الارض خضراء والسماء النّو به حار
مع صحبة تدعي لك القلب مسرور
مع دلة صفراء تبهر بسمار
وبيت الشعر للتو مبني ومعمور
والنفل مع نبت الخزامى والاشجار
مثل الزوالي والزهر فيه منثور
عثمان الرشيد/ الرياض
في هالصفا في هالوفا ولا به أكدار
كان انت تبغى راحتك يبن الأحرار
والراس كايف صدق ماهوب مجبور
إنصى فياض الخير من عقب الأمطار
وأشعل من أرطا لها الخد محفور
تنسى هموم الخلق مع هم الإيجار
وشيطان نفسك يافتى الجود مدحور
عبدالعزيز سعود عيد الدوسري
الناس في فرحه على كثر الامطار
الارض رويانه على السهل والقور
من حمد ربي ربعت كل الاقطار
والناس في نعمه ترا الكل مسرور
الروض منور والصحاري بها ازهار
يازين جو صافي مابه كدور
علي رشيد الرشيد - رياض الخبراء
ومرافق الأخيار وافين الأشبار
كل أبلج يسوى من القوم طابور
ذربين مافيهم خبيث وثرثار
رفقه نظفين الضماير لها دور
سجه نفس قدام قصاف الأعمار
لابد لك من حفرة داخل السور
مبارك محمد آل معمر - المضة
اطربتني للبر وكتبت الاشعار
مشكور يا اللي كاتب البيت مشكور
البر يبعدنا عن هموم وافكار
هواء نقي مذلول والدله تفور
الجو رائع والمطر هل مدرا
والقاع خضراء بالخزاما وبزهور
يحيى علي الوايلي - الرياض
مرباع من شف المرابيع مخضار
فيه البختري ينعش الروح بالفور
والطيف لونه يسبي أصحاب الافكار
روح وريحان تقل جنة الحور
من داج ريضانه نسي كل ما صار
يزول مابه حتى لو كان مسحور
علي الزولاني الفيفي - بيشة
في جلست(ن) فيها حسينات الأشعار
والخير باذن الله موفر وميسور
يا زينها لاجت مع أحباب وأخيار
ناس(ن) على الطيبات دايم لها حضور
مع النشاما اللي على العز حضار
جلسة تزيل الهم والكل مسرور
محمد بن عبد العزيز الخنيفر
جمر الغضا يقلون لي جمر مشهور
واحط جاله دله بجوفها إبهار
ونظر نباتٍ صايرن كُله الزهور
يشرح فوادك من بعد ذِيك لمطار
ويكون لك رفقه وسيعين الصدور
يا زين ها الشبه مع أبعاد لنظار
محمد العيسى/ مكة المكرمة
فيه الخزامى والنفل شايل ازهار
وبقرى وقرقاصٍ دواء صرف دكتور
ريحة نباته طيب من غراش عطار
ما شالت التربة مثل نبته زهور
قوتك لبن خلفة توها جابت حوار
وعشاك حطه بملة الضو مجمور
سعود بن عبدالعزيز الهزاع - نعام
يا ماحلا المكشات من بعد الأمطار
في روضةٍ من شافها صار مسرور
مع شبةٍ تصلى بها دلة بهار
وجمر السمر متحضنٍ قرص مجمور
بعض المواقف حلوها يصير تذكار
ويبقى مع الأيام في البال محفور
إبراهيم بن راشد آل مغيرة / ضرماء
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر غنام مسعود القريني ويقول:
لاتدفعك صوب الخطر فرحة السيل
واخذ العبر وافهم بمعنى السلامه
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع وموضوعه مفتوح للشعراء.