صوت الصورة

خروف أوذي شاه والثلج غطاه
كساه كله ما بقى الا عيونه
عم الصقيع اليوم أرضه ومرعاه
وأهله نسوه وليه ما ينقذونه
محمد إبراهيم الفهيد - الزلفي
هبّت على جو الشمال الشمالي
وزادت برودته القديمة بروده
ونزل عليها الثلج غطى الجبالي
حتى البهايم بانيٍ في جلوده
مدري على دور السنين الطوالي
دار الفلك واليوم سبب وجوده
حمد عبدالله الوايلي - حوطة سدير
خروفنا ضاع في عرر
قبل أمس في ليلة الجمْده
يقول أنا أحب عشب البر
أحب أنا الرمث والجعده
هبت هبوب لها صرصر
والثلج غطاه بالبرده
عبد العزيز الصالح - القصب
خروف ثلّج من المواشي وهو حيّ
كنّه مطلّع من فريزٍ جديده
في تركيا كلٍ على الثلج يمشيّ
حتى الصنوبر مسكرٍ من جليده
سعود عبدالعزيز الهزاع - نعام
للبرد وش وداك والثلج يا حصان
تبْي الدفا إزبن دار نجد العذيّه
بالبرد خلّك بين رفحا أو صديان
وبالحر إسرح في طوارف طميّه
شمال غير البرد به موت الإنسان
بالظلم يذبح دون ذنب أو خطيّه
فهد عقيل الطويان - برديدة
ذكّ الذبيحة قبل تفطس سريعي
في ثلجها خلوا الصلخ بعدين
هالحين هي داخل فريزر طبيعي
فريزرٍ مجان لا كاش لا دين
ولا حل وقت الطبخ وانتم جميعي
أصلخ وقطّع والعن ابوالشياطين
عادل عبدالعزيز الصالح
البرد جانا مع جميع الجهاتي
من طريف لين القنفذه كلها برد
تجمّد الحيوان ويش السواتي ؟
عليه نصوت حيل لكن ما رد
خالد ناصر المخيمر - روضة سدير
الثلج يبني على الحيوان
ما فيه عطفٍ ولا رحمه
لو سكنه داخل البنيان
بالحوش لو صار به زحمه
لو له امزاين مع البعران
كان له قيمةٍ ضخمه
عبدالكريم عبدالرحمن السلوم - القرائن
من عقب ماثلج السما بالوطى طاح
كن الخروف امحنطٍ بالطبيعه
يالله عسى بشراقة الشمس يرتاح
ويسيح ثلجٍ لا يسبب وجيعه
سعود عائش الحربي - القاهرة
حيوان فوقه ثلج مردوم
مشنج من جليد الشمال
بأسباب الأمطار.. وغيوم
وبرد الشتا قارص ولازال
مدعث عيد العبيدي - الرين
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة ..
ويا هلا بالجميع..
صورة العدد