اللغز

كان كاتب اللغز الماضي الشاعر طلال الرشيد من الجبيل ويقول:
ياويش ورع جديد ركز اطنابه
يشع نور على الاجواد مكروهي
لو جاه ورع صغير مر ماهابه
ويخوف اللي عليهم زود مشروهي
وقد توصل للحل شعراً:
الشاص والفكسار كثروا اصحابه
واليا ركبهم سايق ما يتوهي
وساهر ما يرحم سايق ما يهابه
خداع برقه باول الليل مكروهي
خليف فهيد الحربي - الرياض
اللغز كايد وحله مابلشنا به
معروف ماحد يجهله كود مسفوهي
ساهر نظامه غريب ماله مشابه
واصبح نظامه بين جايز ومشبوهي
زبن مقبل العنزي - بريدة
طلال لغزك عرفته والفكر جابه
الحل واضحْ لنا ماهوب مشبوهي
ناسٍ لمال البشر ياصاح نهابة
ساهر من أسباب ساهر صرت معتوهي
راشد ناصر الشقيق - القصيم
اللوحه بانت بسجل ورقم وكتابه
تراه يلقطك ساهرمانت مسفوهي
الموت في سرعتك والحق نرضى به
كم راح من ساهي وكم راح مشبوهي
صالح المحارب المزيني
ساهر هو الحل خذها اسرع اجابه
عن الحل ياصاحبي تراي مااتوهي
عبد الله صالح البشري
طلال يامرحبا واللغز وش جابه
ودي اشارك بحله لو هو مكروهي
الحل ساهر كشفنا مادرينا به
وانا السبب ماشفعت لي قولتي لوهي
راكان عبدالرحمن العريني - البدائع
( ساهر) تأسد وكشَّر عن شفا انيابه
يشوفه اللي مسافر وهو مشدوهي
يبرق بروق ومن صوبه باشهابه
يسدد له أموال لين يصير معتوهي
عبداللطيف الحُمَيَّانِي - عنيزة
يابو رشيد انت لغزك يحسب حسابه
حاولت احله عساني عنه ماتوهي
لي رمعتن قلت ساهر صور اصحابه
مهوب يشره ولا يلحقه مشروهي
سعد صنهات السهلي- الدرعية
طلال غنى وسوا لغز وجانابه
قافه مميز وعسر وينتهي باوهي
الحل ساهر وجاك الحل بكتابه
لاشك مثلك ترا ماهو بمسفوهي
مصلح بن تركي بن مرزن - الجمش
الحل يا اللي كتبت اللغز جينا به
واضح وضوح من لا يشوفه يتوهي
على الاجاويد ساهر ما بلشنا به
لكن ما يعترف في جاه ووجوهي
خالد سجدي العتيبي
ياحي من هو نشر اللغز ثم جابه
واللغز حلو وحله سهل ماتوهي
ساهر ومن خالفه يلقى له عقابه
ويحذره كل من عليه مشروهي
أسيل سعود الحربي
لغز الأسبوع
كتبه للصفحه الشاعر جمعان بن حشر بن قويد من وادي الدواسر ويقول:
ويش الفتاة اللي تبي عدة ازواج
الزوج الاول ماكفا دون ثاني
وان هرمت تحتاج ياناس تحتاج
تحتاج ثالث زوج والحل باني
نستقبل الحلول عبر الايميل
rb-khozama@alriyadh.com
او الفاكس 014871070
كما نرحب بطرح الألغاز الجيدة.