اللغز

كان كاتب اللغز الماضي الشاعر عبدالله سمير الحربي من بريدة والذي يقول :
ويش رجل بالمواقف له خوي
وحبة من خردل يرجع وراه
من قنع بالعلم نعتبره سوي
واللي ما يقنع يعض اصلب حصاه
وقد توصل للحل شعرا:
يالله إني طالبك باسٍ قوي
ياكريمٍ كل خلقه في رجاه
ياعساها اعمالنا تضوي ضوي
وتثقل الميزان وترحمنا معاه
احمد ناصر المحرج - الرياض
ما يحل اللغز كود المهتوي
خصّ لا صار اللغز عالي بناه
حله الميزان بالقسط السّوي
من رجح بالخير ناجح بالحياه
مقرن بن متعب الهرف-الرياض
مرحبا حييت وأبشر ترتوي
من صلاح الحل يا لحربي لقاه
حله الميزان مبطي بالحوي
وأنقطع ذا الوقت ماله من طراه
صلاح بن عبدالله اليابس - الدمام
قلت يابن سمير لك لغزن قوي
كم غلامن لويحاول مالقاه
قلت انا الميزان ظنى ياخوى
كانني مخطيه انا غيرى لقاه
سعد صنهات السهلي الدرعيه
شفت لغز بالجريدة مستوي
من قراه يقوم يدور محتواه
حله الميزان والشاعر قوي
من بيوت الشعر نعرف مستواه
علي رشيد الرشيد - رياض الخبراء
حله الميزان وانته لي خوي
كم رجل يبغى حله مالقاه
واتعب اللي يرمعه حيثه قوي
اشهد ان اللغز جيد مستواه
محمدوابودحيم - البدائع
لغز الاسبوع
ارسله للصفحة الشاعر صلاح بن عبدالله اليابس من الدمام ويقول:
أنشدك عن رجال يحتاج تغيير
واجب علينا يا جماعة نغيّر
واللي موكل به ثلاثة بهم خير
واحد بيدك وما تبقّى صغيّر
واجزم انه ترتعد منه ملوك الغابه
نستقبل الحلول عبر الايميل
rb-khozama@alriyadh.com
او الفاكس 014871070
كما نرحب بطرح الألغاز الجيدة.