صوت الصورة

يا طير وش عندك على طول هديت
روحت بسبوقك وراعيك طربان
والجو خالي لو كفخت وتعليت
ما فيه صيدٍ شايفينه بالاعيان
ويا وقت ياللي راح ليتك تونيت
كان الصقر يشبع وراعيه شبعان
حمد عبدالله الوايلي - حوطة سدير
وشلون ينهد الوحَش والحبل فيه
متطوطحٍ من الساق في عالي الجو
حبله بينشب فالشجر ثم يوذيه
وعن الفريسة يعرقله ليا تلاقو
الحر صقاره يبي شوي توجيه
ولا يريّح يشوي الطير في الضو
سعود بن عبدالعزيز الهزاع – نعام
الطير مدرّب ما خفى تعرفونه
واللي على التدريب خطيرٍ يروحي
الحرّ .. حرّ ولازمٍ تكرمونه
خلك معه طيّب .. وخلك سموحي
يحتاج له تمرين ما تجهلونه
في شوفته للخرب يبدأ يلوحي
محمد عبدالعزيز الخنيفر - أشيقر
الطير عيده سما مفتوح بالبيد
ياما لصقاره أهدى حباري
وكفٍ شلع منها يحوم ويعيد
ما يقسمه إله الكون لابد جاري
وياما عرف صوت صقاره تراديد
وما بينهم حب وبالصوره مواري
سعود عائش الحربي – جدة
أطلق سراحه طاير الجو يجتال
خله يشوف طيور الحباري ملابيد
خله يعس البر ويجيك بالحال
وبين المخالب ما طلبته من الصيد
لاشاش هو والخرب طوّحت بعقال
وأكبر سعادة عودته كنّها عيد
خالد ناصر المخيمر - روضة سدير
يا طير ما مثلك على الجو يا طير
لامن لمحت الخرب صعبٍ تخليه
هو في هوا الصقار وللصيده يغير
ذي عادةٍ له دايم الصيد يجنيه
يا صقر ياللي لك محبة وتقدير
دايم وفي والوفاء أنت راعيه
ريان محمد الخنيفر - الرياض
ألا يا هني الطير من حيث أراد يطير
يسج الفضا ما حدٍ طلبه منه تأشيره
ليا ظاق صدره من غثا زيد هو وعمير
يغادر بلدهم يشرح الصدر في غيره
بدر الحزيمي
يا طير يا طير الهنا والسعاده
لك المحبه دايم الحب ويزيد
تظربك الأمثال رمز الإراده
شامخ قوي العزم ما فيك ترديد
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بما تلتقطه عدساتكم من الصور
الهادفة والطريفة .. ويا هلا ومرحبا
صورة العدد السابق