ملتقى الشعراء

قصيدتان الأولى بدع خالد الجريشي والثانية جواب سعد العتيبي
الصوت
يقول خالد الجريش:
قرب سهيل وصار بالقلب هوجاس
يلوي ويقطع يا سعد ماتدرا
الصيد قل وما ورا الصيد نوماس
صارت علوم بالمجالس تطرا
الناس كثرت بالخلا فوق الاطعاس
ما صار بالمقناص حلو ومرا
كل نقل بندق وقر من وقرناس
وحط الجهاز بحوزته ويتحرا
اقول تايب يا سعد مير ينحاس
قلبي اليا شاقه على الوكر حرا
وقمت اتذكر نقلت الطير عفاس
عودت للمقناص لو فيه شرا
الصدى
يقول سعد العتيبي:
يا خالد بن جريش كفيت الاتعاس
وسلمت يا نسل القروم المضرا
لا صار بك للبر والصيد لولاس
وراع الولع مغلوب لوهو تبرا
عان الكروز اللي على القاع نطاس
والطير هاته والمزاهب تصرا
عليه ناخذ يابن الاجواد مرواس
نبي نتشطر من ورا الحد برا
ياما حلا في خايع خالي الناس
عليه قطعان العرب ماتمرا
العام ربع وانصرم عوده ايباس
وهذي السنه من رايح الوسم ثرا
متخالف نبته يدارجه نسناس
فيه أم سالم باللحون اتطرا
عسر على الانذال ووجيه الافلاس
اللي على فعل المراجل تزرا
اللي لهم في كل مامون مدواس
وارض الخطر ماحد عليها تجرا
لولا جهازات لها اشكال واجناس
راحو مراح مقيط يومه تورا