جرح الشعر

فاح الكلام وعارضه للملا شاب
طاح السؤال وفاح عطر الإجابه
الشعر ضيف.. وصدر الأحرار ترحاب
يا مرحبا بالضيف يامر حبابه
نبض الحروف المترفه طهر الألباب
تارد على جم ٍعذي (ن) شرابه
عرفي مراجع للتواريخ بكتاب
باسم يشرفني وأشرف جنابه
من شاعر ٍ لا قال يحسب له حساب
واللي حسب لي حاسب ٍ له حسابه
شاعر تعلاّ وأعتلا رأس مرقاب
سلامه أحلا من قراح السحابه
نوماس عرفي للأجانيب وأقراب
ودرب العلا يستاهله من رقابه
للعز يارأس ٍعن الحق ماغاب
وماهي غريبه .. لو يغيب الغرابه
لاشحت حلوق القصايد ولاجاب
فكري سرج للحق خيل الكتابه
ياأهل المقام أكبر من العذر الأسباب
والهرج لسمانه زبون ومهابه
دام الصراحه بيننا سر الأصحاب
جرح الشعر.. ياأهل الشعر يندعابه
الحق رجل ٍ ماستر وجهه نقاب
دام الوفاء بعروق دمه مشابه
وحقاً تقاعس دونه اليوم طلاب
يروح ولافي رجعته فتح جابه
وبيت الأدب لولا القرايا والأطناب
أومت به رياح الذهاب لذهابه
بيوتنا اللي شعبها حروف الأداب
من العمار أمست هدام وخرابه
سيف ٍ بليا نصاب راعيه ماصاب
الحيل واني ماسطا لاهوابه
أما كذا نبقا على خير ماطاب
ولاّ الشعر يغلق من الآن بابه