له نظرةٍ ترسل بليا مناديب

البارحه قضيت ليلي خلاوي
سامرت وسواس الضلوع المحاديب
سامرتها والنوم ما له شهاوي
والعين كنه في هدبها مشاهيب
كني عليل(ن) والرجى فالمداوي
من بعد رجوى الله يزيل المتاعيب
ولا كسير وعاسرته الخطاوي
صادته بقعا بسوها والمعاطيب
حالي طواه الهم والحزن طاوي
طوي الجرايد في يدين الكتاتيب
من شافني بالعين يأسف وياوي
ويقول يا شين الزمن له مخاليب
اليوم ابكشف كل علم(ن) خفاوي
لعل عند الغير حل وتجاريب
أنا بلاي ذبحني وكاوي
اللي سقاني سم ما به تطابيب
غرون على قول المثل واللجاوي
له نطرتن ترسل بليا مناديب
وما له شبيه(ن) فالصص والحكاوي
ان رحت يم الشرق ولا تغاريب
وله ذوق في لبس العبي والغطاوي
يضفي عليه من الحسن والتهاذيب
سبحان خلاقه بليا مساوي
وسبحان من يبدع بليا عذاريب
اقفى وانا بين الرجى والمناوي
يا ليت ما صاب الحشى عنده يصيب
دور علي بداخل النفس لاوي
والشاهد الله زاد بي المكاريب
ليته من الأقراب بهاك الحراوي
ولا قصير البيت زين الرعابيب
ولا من الأصحاب لو هو نحاوي
أهل الديار مكرمين الأصاحيب
الحب بلوى من كبار البلاوي
يشب في قلب المعنا لواهيب
وانا على مشهات قلبي شفاوي
ولا يهمني درب العنا والمصاعيب
وختامها وان زل قول الشقاوي
الكامل الله عالم(ن) بالمطاليب
تركي سند الهملان