هذا تراث أجدادنا فيه تذكار ذكرى لجيل اليوم لا شاف ماضيه

صوت الصورة

يا زين وقتٍ فات يا ناس زيناه
يوم البيوت أثله .. ولبنه وطينه
بيتٍ عليه العلم لا قام مبناه
تقول نازلةٍ عليه السكينه
مشرّعٍ بابه ومن جاه ينصاه
ما هوب وقتٍ كلنا خابرينه
فهد بن علي الحبيب
استاد من فوق الخشب يبني إجدار
من الطين واللبنه وبيديه يبنيه
هذا تراث أجدادنا فيه تذكار
ذكرى لجيل اليوم لا شاف ماضيه
محمد إبراهيم الفهيد - الزلفي
صورة العدد السابق
الاستاد عاد لمهنته بعد ما غاب
عنها حوالي أربع عقود وأكثر
من الطين يبنون الملاحق في الاسياب
عاد الحنين لماضيٍ راح وادبر
ولهم تفنن في الدرايش والأبواب
لي شافها عوّد عن صباه عبّر
سعود بن عبدالعزيز الهزاع - نعام
هذا المعلم يبني إجدار بيديه
يبني مثل بني الجدود القدامي
يمكن يطيح وتنكسر كل رجليه
وهو السبب جنّب طريق السلامه
رجلٍ غشيم ولا لقا ناس تهديه
ويبي يخلص قبل يبدا الدوامي
عقلا خزن العنزي
راحوا رجالٍ عمرو الدار تعمير
بالطين واللبنه وشد الأخشاب
لا فيه لا عامل ولا فيه تزوير
كلٍ يشمّر عن ذراعه يالاحباب
حمد عبدالله الوايلي - حوطة سدير
ألا يا (الرياض) نبي تقرير
عن البنا الأول وصوعوباته
ويرفق مع النبا تصاوير
ودنا نعرف كل تفصيلاته
ماضي بن زيد القضاعي – الشعراء
عاد البنا بالطين من يوم الأجداد
يوم البنا بالطين لبنه وطينه
فوق العروق معلمٍ صار واستاد
قدم البيوت اليوم ذكرى وزينه
عبد المحسن بن محمد المحيسن
رياض الخبراء
يا ما حلا البنيان ويا زين ذكراه
يا ما يذكّرنا عصورن قديمات
هذا تراث جدودنا ما نسيناه
هذا هو التاريخ في ماضيٍ فات
محمد بن عبدالعزيز الخنيفر - أشيقر
صورة تشير الماضي
يوم البنا بالحجر والطين
وكلٍ بها يومها راضي
ذا ما توفر بذاك الحين
والود بالسطح متغاضي
عن الخطر والضعفين
سعود عائش الحربي – جدة
بيت الحجر والطين تصميم الأجداد
عندي يساوي ناطحات السحابه
فيها الوناسه .. والتواضع .. والاجواد
رمز الأصالة .. والصدق .. والنجابه
علي آل زولان الفيفي - بيشه
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة