كما تشوف الناس مثلك يشوفون

الموج عاتي يا سفينه تواسي
غصبٍ على الحساد وإبليس ملعون
بإذن الولي ما أهتز عرشي وساسي
أصدح على القمة والأنذال يوحون
صحيت يا فكري وصحيت راسي
وأنته خصومك يا نجاحي يزيدون
والريح لو تعصف جبالي رواسي
والناس لو تعطيك قاموا يمنّون
هرّاجة المجلس كثار الحساسي
اللي بعرض الخلق دايم يهيمون
هرج ونميمة والحياة اختلاسي
ومهايط زايد والافعال ما لون
لاجيتهم حطوك بأول كراسي
وطاروا من الفرحة وقاموا يهلون
ولقفيت عنهم صار فيه انتكاسي
وكلٍ خذا دلوه وقاموا يغرفون
هذا يفصّل ذاك جاب المقاسي
بأية طريقة بس لازم يحشّون
يا مراقب الغرات ويش انت ناسي
وقف معي لحظة وقولك وشلون؟
اشغلت نفسك والحياة اقتباسي
كما تشوف الناس مثلك يشوفون
أحد شرى الدنيا متاع متناسي
وأحد حفظ دينه مع اللي يصلّون
نازح الروقي