سلمان به حزم وعزم وبصيرة

يا امير نجد وشبل ليث الجزيره
يا من كسبت الطيب في كل ميدان
سلمان يا نادر حرار شهيره
سلمان يا رمز الوفا يا كحيلان
لك في سجل المجد يا امير سيره
سطرتها بالطيب يا طير حوران
وضمن قرارات المليك الاخيره
قرار كل فيه معجب وفرحان
سلمان حلال الأمور العسيره
بوزارة الدفاع صمام الامان
منصب ما يصلح له من الناس غيره
لأنه المأمون في حفظ الاوطان
سلمان به حزم وعزم وبصيره
ووزارة الدفاع تحتاج سلمان
له منجزات بالاشاده جديره
وله سطوة ينهي بها كل عدوان
من همته تصغر امور كبيره
ومن هيبته تهوي نجوم وتيجان
وطيبه طبيعه فيه ما يستعيره
عز الله ان سلمان للطيب عنوان
ان قيل من يعطي اسرنا الفقيره
يعطيهم مشيد مشاريع الاسكان
وان قيل من عم اليتامى بخيره
ما لليتامى غير من اسس (إنسان)
وان قيل من طب الجروح الخطيره
ابوفهد هو بلسم جروح الابدان
وان قيل من سلوى النفوس الكسيره
ابوفهد شوفه للاحزان سلوان
تاج الوفا لسلمان ما حد خشيره
ويشهد على هذا الوفا اخوه سلطان
والجود كانه نهر يجري غديره
من كف سلمان الكرم نبع الاحسان
والطيب كانه روض يجذب عبيره
سلمان له والله مثل وبل الامزان
كم جاه مضيوم وحاله مريره
ورجع ولاكنه جرع ضيم الازمان
وكم جاه محزون دموعه نثيره
ورجع ولاكنه عرف طعم الاحزان
وكم جاه من حظه ترادى مسيره
ورجع وحظه معتلى فوق الاكوان
وكم جاه من للفقر نفسه اسيره
ورجع مزكي من عطا ذرب الايمان
نفخر بحبه بالعلن والسريره
وما يختلف والله على حبه اثنان
عطا الله بن سليمان العطا الله - الزلفي