عواكيس

العزيز معوكس كيف عرفت ان تيسير آل نتيف تهجم على حسين عبدالغني؟
نايف الرشيدي- الدمام
-يوم قال ابو عمر انه بيكررها في المباراة الجاية!!
الاستاذ معوكس ما الذي يتقص لجنة الانضباط حتى تكون زي لجنة الانضباط في الامارات.. وعلى فكرة وين راح عضو اللجنة اللي ابعد العام الماضي؟
محمد الدويغري- الطائف
-الشجاعه!!
الناقد الكبير معوكس ليش ريكارد يقول انه ما يحتاج محمد نور واخرتها يستدعيه.. ظنك تصريحه مفبرك والا الرجال ناسي؟
عبدالله التومي- حفر الباطن
-يبي يسلم!!
الاكشن معوكس شفت بعض المحللين يومه يحاول ان يؤكد ان ايمانا قام بحركة الاصبع ويوم اخرجوه على الهواء قال انه بصق ويوم جابوا الاعادة وماطلع شيء قال كان ينوي انه يبصق وش السواة؟
فارس الخالدي- الخبر
-السواة يعينونه في انضباط الفيفا!!
الجميل دائما معوكس اقترح عليك تقديم برنامج اسمه على الريق ومن شروط الاستضافة ان الضيف ما افطر عشان تظهر الحقيقة بدون لف ودوران؟
حمد العتيبي- عفيف
- مافطر نحط له قلابة وبيض عيون!!
صراحة يامعوكس ضعنا بالطوشة مرة نشوف بالتلفزيون شخصاً واحداً متحدث رسمي ومرة اعلامي ومرة عضو شرف ومرة خبير رياضي.. ياخي قلهم يرسون على بر.. بدل فوضى المسميات ومحولات الضحك على الذقون؟
بندر العصاي- عنيزه
-البر شمس ومافيه الاضبان!!
الاخ العزيز معوكس وش رأيك باللي يسوق لمديره ويتصل على الاصدقاء ويطلب منهم استضافته ويضبط له الامور عشان يضمن القرب كنه دائما وفي نفس الوقت يخدم فريقه على طول؟
نواف الجعيد – الطائف
-اللي يسوق بشره بالترقية!!
هل صحيح يامعوكس انك خبير في النظرات بمعنى انك تعرف ميول الاعلامي من اول نظره.. زدنا من خبارتك زادك الله موهبة؟
عايش المطيري- المجمعة
-مايحتاج خبره اللي معه علم واللي يصور مع الكاس!!
صراحة يامعوكس ان بعض المتحدثين نكتة.. يبي يسوي نفسه انه فاهم ويحيب العيد ضده وضد فريقه؟
صالح الغضوري- سكاكا
-نكته بس ماتضحك!!
صحيح يامعوكس يقولون ان اول مرة تقابل فيها صديقك في البلوت يوم فاز عليك قال لك ما عاد اشوفك؟
يوسف التميمي- الرياض
- بعذره نسيت 400!!
ليش ما تصير يامعوكس ناقد حصري لبعض القنوات ترى كلها كم ترقيصه للمدير وفريق الاعداد وانك تحب فريقهم وشرط تصير اساسي؟
فهد الناصر- جدة
- ترقيصه يبي له ميسي!!
والله مكشوفة بعض البرامج يامعوكس قال فلان وزي ما كتب فلان وصراحة اتفق مع اخي فلان.. واخرتها كلهم في استراحة وحدة وقبل البرنامج خذ ياتفاقيات من نستضيف وش تبونا نقول ومن اللي ما نبي؟
سعود الكثيري – الافلاج
- وما صديقنا الا آنا!!
صاحب المليون رساله ابو العواكيس
تحيه وبعد:
ودي أعرف اكلتك المفضله المندي ولا فول الحله؟
عبدالملك المرشد- عرقه
-ابشرك ماعاد آكل الا كبه وحمص!!
الحبيب ابو العواكيس
تحيه وبعد:
ياخي نبي بحر نبي شاطي نبي نلعب كرة طائره شاطئية
صديقك-حمد الدوسري-ابومبارك-العزيزية
-تكفى يا البخيت!