صوت الصورة

امة ياربعنا كلها حول الخطر
كيف هذا حاصل والتجمهر مايفيد
امننا ما قصروا قمة لامن حضر
ومن يطعس له نظام يسيره مايحيد
يا شباب اليوم شوفوا طريق مايضر
واحذروا ثم احذروا واتقوا شر الحديد
محمد بن عبدالعزيز الخنيفر
شفت لي ناس تجمع في الزبارة
الله يعز الوطن واللي حكمها
المفحط ما يحسب للخسارة
ما حفظ سيارته يوم استلمها
طلعت الدركال يحسبها شطارة
الشطارة طاعة الله واغتنمها
شبيب حمود القحطاني - المزاحمية
ياهل التطعيس جانا ما كفانا
المآسي منكم زادت علينا
كم فقيد راح من سبة هوانا
ما حسبنا حساب دمعة والدينا
اشكروا منهو على الملة هدانا
نعمة كبرى وامن به حيينا
خالد بن ناصر المخيمر
دامنا نشكر فخير الله بزايد
ويا الله ان تحفظ بلادي وتحميها
نعرف الاسراف ما منه فوايد
والحقيقة واضحة للي يبيها
فالاذاعة والمنابر والجرايد
واهل الاسراف ما تسمع اذنيها
محمد جلمود الشكرة - الدلم
ياهل التفحيط في طعس التحدي
فالنفود اللي على خط الثمامة
اتركوا فعل التهور والتمدي
في طريق ما وراه إلا الندامة
طايشين وطيشكم طيش متعدي
بالمواتر من عدامه في عدامه
هذال بن سعيدان العصيمي - الرياض
شفت الشباب وشفتهم فالنفودي
والجيب ياهل الجيب مزين حلاياه
اللي على التطعيس دايم يزودي
وارد عراوي يقطع الله مزاياه
عقب العصر ما تعرف الهم احدودي
خصن اليا جانا المطر صبح حياه
مسعود عزيز الحزيمي - الهلالية
اليوم يوم اللي رقا فوق الاطعاس
وشد العزم في عاليات العقومي
حط الدبل مع نمرة القير بقياس
وشق الرمال اللي تشيل العزومي
الجيب له صولات وهو غاية الناس
دايم مع الكشتات ضيف محشومي
سعود بن سعد الحافي
محفل رعاه وجوله اكبار واصغار
فيصل بن بندر أمير القصيمي
واصبح حفل رسمي على الحول دوار
في نقرة أم دباب فكرة فهيمي
اهواية التطعيس في وقت الامطار
تطيب وقت اعصير والجو ديمي
فهد بن عقيل الطويان - بريدة
منظر عجيب شفت انا بأم دباب
شباب يمارس هواية خطيرة
هواية التطعيس مع بعض الاصحاب
تجمعوا تقول في وسط ديرة
احدن طلع ريوس وهو فاتح الباب
واحدن تعلق فوق تسمع عريرة
علي غنام الغنام - رياض الخبراء