اللغز

الأسبوع الماضي كان لغز الأسبوع من طرح الشاعر جسار مهدي السبيعي والذي يقول:
الفحل في مقدم الذود والا من وراه
الحقيقه ما بعد شفت مثله بالعيون
اسود من قدم واللي ورى مثل الرغاه
له بنات وله عيال على شكله يجون
البنات لمقدمه والعيال ليا قفاه
قبل ما تطلع عياله بناته يطلعون
من جمال الكون والحسن والوضع انتباه
يظهر الله من بناته ثلاث يفتنون
وقد توصل للحل شعراً:
الفحل ياللي تعد الفحل دوك معناه
الشهر واضح وسلم على اللي يسمعون
والبنات أهن الليالي على كل التجاه
والعيال أبامها والخلايق يفهمون
والثلاث البيض يالقرم في عالي سماه
سعد منهو صامهن والخلايق يفطرون
جمعان بن حشر بن قويد - من وادي الدواسر
الشهر واليوم والليل قدره الاله
قدره ربي على الناس ياللي يتفهمون
من تصاريف الخلايق وأمراً قد قضاه
نسأل الله جنة الخلد وانهار وعيون
مقرن بن متعب الهرف - الرياض
الله اللي صور الكون بالحسن وعطاه
الليالي هي والأيام منه يبتدون
كل يوم يمر يحسب ولا يرجع ورا
والليال البيض وسط الشهر ما تجهلون
صلاح بن عبدالله اليابس - رحيمة
السبيعي جاب لغز جاب لغز من قراه
بالجريدة واضح معناه للي يعرفون
الحلول ميسرة والحل ذا لمن بغاه
والهلال الحل عندي.. عندي وش تبون
عبدالمحسن بن محمد المحيسن
مرحباً بك يا السبيعي ولغزك يا حلاه
قمت أفكر بالجواب وانتقي زين اللحون
صار حله بالشهر والهلال اللي زهاه
والليالي والأيام طول مره يظهرون
علي رشيد الرشيد
الثالث البيض في وسط الفلاه
هي مقصد للي يحبون السكون
والهلال يبين من قبل الصلاة
مبتوعة «كلٌ في فلك يسبحون»
بندر عواد الطارق - الجوف
لغز الأسبوع
كتبه للصفحة الشاعر عبدالعزيز علي الصالح من حائل ويقول
يا ويش طفل محتقر والله جعل فيه بركه
وأخوانه أكبر منه لكن ما حدن منهم أفاد
ليا نخيته مرة يوصلك مدن المملكه
وليا نختيته مرين يم أقصى البلاد
نستقبل الحل على الفاكس 4871070 أو الايميل rb-Khiozama@alriydah.com.
كما نرحب بطرح الألغاز الجيدة.