يا ناس خلوا كل وادٍ ومجراه

لوحة من الماضي

يا الله ياللي تسجد الناس لرضاه
يا وامر خلقه على حج بيته
تفرج لمن سده على الناس ما ابداه
راضي على مقسومك اللي عطيته
من شيٍ يسل الحال والجسم يبراه
والناس ما يشفونه إن ما شفيته
قلت: آه واجرحاه من خلتي آه
وإن حملوني حمل غيري قويته
قالوا: سفا بالحال ويش اللي أغواه ؟
قلت: آه ويش المنكر اللي وطيته ؟
قالوا: جهلت وبان علمك لمنهاه
قلت: آه علمي يا ملا ما كميته
قالوا: طلبنا لك من الله معافاه
قلت: آه وحده.. وعفوه رجيته
قالوا: هله وأحباب عينه نصحناه
قلت: آه هذا واردٍ ما بغيته
قالوا: ندور لك من البيض حلياه
قلت: آه لو غيره بكفي رميته
قالوا: نشاش العود مالك بلاماه
قلت: آه عود الموز بيدي لويته
قالوا: تزوج كود تدله وتنساه
قلت: آه لو خذت أربعٍ ما نسيته
قالوا: من أقصى الناس وين أنت وياه
قلت: آه ما أنسى يوم جاني وجيته
قالوا: نشوفه عند هذا.. وهذاه
قلت: آه عمره ما عقب حجر بيته
قالوا: عليلٍ ناقلٍ داه برداه
قلت: آه باقرابي.. وروحي فديته
قالوا: نشير ولا نفع ما حكيناه
قلت: آه هرّاج النمايم عصيته
قالوا: كثر شيبك وقلبك بعمياه
قلت: آه لو قلبي غريراً نهيته
مطاوعٍ قلبي بعجفاه وقداه
وإلى عطا منهاج دربٍ عطيته
يا ناس خلوا كل وادٍ ومجراه
قلتوا كثير وقولكم مالقيته
شعر - عبدالله بن حمود بن سبيل
!!Article.footers.caption!!