درة بحر

لا صار لك في بعض الأبشار حاجه
خلك معه ماشي على وجهت السير
إما قضاها لك بليا لجاجه
وإلا عطيته من الملا واحد غير
احفظ لسانك عن كلام السماجه
واحذر يوردك الخطا والمعاذير
كرامتك يا القرم مثل الزجاجه
حافظ عليها بالعقل والتباصير
واعرف ترى هيبتك بيدك اسراجه
اللي تقدابه عن الذل وتسير
واعرف ترى صبرك يحقق رواجه
بامر الولي تلقى الفرج والتياسير
واعرف ترى عيب الرجل في مزاجه
يا صار ما يقدر طوال الأشابير
يصير بين الناس مثل الخواجه
ويطيح قدره من عيون المناعير
والحر يعرف مدخله من خراجه
والبوم بوم ولا يعرف المعابير
والبندق اللي في نظرها انعواجه
تخطي هدفها لو بيد سالم الزير
والمزنه اللي قافيتها عجاجه
ما غيرت مسارها حزت عصير
براقها في الجاش فتح ادراجه
وانهل وبله مثل وبل المعاصير
درة بحر ليل تصافق أمواجه
اخرجتها للناس بأحلى التصاوير
ولبستها جلباب عزه وتاجه
ووشمتها وشم البني الغنادير
واللي جلبها عارف وش نتاجه
شاعر وعنده للمعاني تفاسير
حامد بن طرقي الذرعي