الرموز المبهمات

يلي نهبت القلب مني غصيبه
واصبح رهينه وانت ماخذت تقرير
القلب في يدينك ولاتعتني به
وتصد وتكابر وتعطي معاذير
فك الرموز المبهمات العجيبه
خلك شجيع وفسر العلم تفسير
ان كان عندك شخص روح اهتني به
روح وتهن ولاحصل منك تقصير
وان كان شايفني كبير(ن) وشيببه
شيبي تراه من البنات الغنادير
ما هو كبر والكبر ماهو مصيبه
العمر توه ياعسى خير ياطير
انا سهوم الحب فيني عطيبه
تمكنت مني وانا دوبي صغير
باسبابها عايش بدنيا غريبه
ورجلي متعبها بكثر المشاوير
اسري واروح بليل ما ينسري به
واصل مواصيل الرجال المناعير
ولي مع اهل العرف كلمه وهيبه
وفالمجلس المربوع حشمه وتقدير
وليا رميت ارمي واصيب الضريبه
وقسمي من اخيار القسوم المشاهير
واموت وانا مارضيت الغليبه
ولاحنيت الراس لو راسي يطير
عريب جد وساس وانتي عريبه
احكم وسرك يا ادعج العين في بير
لاعاد تجلس بين شك (ن) وريبه
ما هو بعيب تحرر العلم تحرير
لكن قبل اتروح قلبي تجيبه
جيبه وانا ليه مع القلب تدبير
مادام ماعندك هوا وش تبي به
رده محله واتركه للمقادير
يمكن بعد جرحك يحصل طبيبه
وتصفاله الايام ويعيش في خير