يقولون الهوى بلوى ولا به عشق دون أسباب وانا يا بنت مبلي في هواك بسبة عيونك بلي في حبك فؤادي ومن شدة غرامي ذاب حرام إنك تسميني باسم غير مجنونك ونا لي قلب متولع بعشق الرمش والأهداب وشعري لك كتبته من سواد الكحل بجفونك انا مقدر أحط بيني وبينك في الغرام حجاب ولا بيهمني حكي العواذل لا يهمونك أعارض وارفض الحاجز وقفل السور والأبواب يمين الله غير الموت قط ما حال شي دونك ولا أقدر أعيش أوهام واحيا في أمل كذاب عساك إتقدري ظرفي وتنسي الشك وظنونك وهبتك كل عمري لك بلا منه ودون حساب أبقطن في مقاطينك وابضعن ساعة ضعونك صدق من قال لك بسمة جميلة تسحر الألباب تحبب فيك ناس قبل شوفك ما يحبونك وانا من حين ما شفتك وانا من نظرتك منصاب يفز القلب لي مني سمعت الناس يطرونك نعم كنتي وما زلتي تثيري فيني الاعجاب أشوفك وانتشي وارقص طرب لغناك ولحونك وأنا ياما نصحت القلب. تب يا خافقي: ما تاب! عن حبك. ولا يمكن يفرط فيك ويخونك تعالي كان تغليني بنتعاتب عتب الاحباب عليك الله ما ودي سوى ضحكه من سنونك إذا يرضيك تعذيبي وقصدك في الغياب عقاب دخيلك يابعد روحي شوي شوي على هونك بدونك ما أرى في الكون شي ينقال له جذاب تغير كل شي في غيبتك بعيون مضنونك
