آخر العشق

أسعد الله صباحك لي ويسعد مساك
ألتقي فيك والقى فرحتي والهنى
لا تخافين شايف بك خجل وإرتباك
سولفى مابه الا انت وقلبي وانا
واطمئني تري مابه هوى إلا هواك
يعلم الله مالي عن غرامك غنى
وسط قلبي مكانك فيه يكبر غلاك
لا تغارين من غاده ولا من منى
انت ياللي البهى كله بعض من بهاك
ساطع النور لي مرك وقف وانحنى
والسنى ما توصل بعد لآخر سناك
في حضورك بهية وش يكون السنى
ودي ابلغ إلى أقصى مدى من مداك
لآخر العشق لي مزروع بقلوبنا
ودي أقطف ورودك واجني أطيب جناك
بعد ما حسنك الساطع عليه جنى
جيت ودي أحقق يا حياتي مناك
علنا ل التقينا تصدق أحلامنا
جيت يا بنت واقف لك بعتبة فناك
ودي أنسى التعب كله معك والعنى
كل ما غاب طيفك عن خيالي دعاك
قلب عاشق ينادي لك تعالي هنا
وأسعد الله صباحك لي ويسعد مساك
والتحيات والأشواق واحلى المنى