رحلة الحب

رغم ونة خفوقي رعشته وارتجافه
ماشعرتي بنبض القلب لي تسكنينه
إنه الحب، لكن للأسف ياحسافه
تستخفين باحساسي وتتجاهلينه
ارفقي بالخفوق اللي ملكتي شغافه
دامه أصبح متيم في يدينك رهينه
وإن تقولين عرف لي الهوى وش وصافه
طالعي في عيوني كان ما تعرفينه
وارجع أضيف جمله في غرامك إضافه
إن جهلتي المحبه فالغلا انتي بعينه
بين قلبي وقلبك مابغينا كلافه
ريحي طرفك النعسان لا تسهرينه
واتركيني أسافر في عيونك مسافه
(رحلة الحب) ما تتعب شراع السفينه
صدقيني سواد العيش والرمش أخافه
كم فؤاد بنظرات الغلا تطعنينه
توي أدري بأن العمر لي مر تافه
بعد ما ضاعت بدونك ومرت سنينه
يحس بي من بلي في العشق مثلي وشافه
كيف يسلى وطيفك دوم قدام عينه
ليه ما تشفقي بي.. تأخذك بي رأفه
سلميني يمينك واخذي اللي تبينه
والله إني أحبك حب ماهو خرافه
صعب يخطر على بالك وتتصورينه
لانك الذوق كله والحلا واللطافه
اضحكي ما أبي شوفك بلحظه حزينه