لا تعتذر عذرٍ ينقّص مقامك

لاتعتذر عذرٍ ينقّص مقامك
لاصار ماهو عند شخصٍ يجلّه
والله يلو يبلغ خطاك لغمامك
العذر عند اقليّل الأصل ذلّه
خلّه يولّي لايثير اهتمامك
يزعل ويرضى عند شبهه محلّه
لاتهدر لوقتك لتثبت كلامك
لسيئ النيّه ونفسه مغلّه
فن التجاهل أدرجه في نظامك
تدقيقك بكل المواقف مملّه
إهتم في نفسك وعزز سلامك
الداخلي وابْعده عن كل علّه
عليك بكتابك وجعبة سهامك
ولايضرك من هو اغواه ضلّه
واحرص على النادر وخلّه حزامك
يسترك لابيّن بك الوقت خلّه
واللاش لوهو من خلايا عظامك
لاتحتزم به نكث كلٍ يحلّه
اكمل مسيرك لين تبلغ مرامك
دامٍ هدفك ابأمّ عينك تدلّه
حلّق وخلّ الغيم أدنى غرامك
وانزل علوٍ محد غيرك وصلّه
وان شفت من حولك تنابح خصامك
هذا دليل إنك على خير ملّه
عوض سلامة العنزي