صوت وصدى

يالعبد وإن ضاقت من الناس دنياك
ازبن على من صور الكون كلّه
ازبن على مولاك خلاّق الافلاك
اللي يظل من التجا به لظلّه
اللي من الصلصال يالعبد سواك
شيءٍ عملته خالقك حافظٍ له
اللي يدير أركان ملكه بليّاك
رب القضا ما بالقضا فاطنٍ له
إن راد لك خيرٍ على الخير مشّاك
محصي جميع الخلق دقّه وجله
هو الذي ينجيك من كود بلواك
اللي عقل يوسف على غالي له
يالعبد في دنياك يالعبد بانهاك
خذ ما خطر بالبال يا سامعٍ له
جارك ليا منه بغى طول لا ماك
احذر رخيص الهرج لا تستمل له
ورفيقك اللي ماشي درب ممشاك
إلى انعقد حبله على الكود حله
وراعي الجمايل خل دونه حميّاك
لا تتركه واجعل بقلبك محله
لا تتركه بالكود لا عداه واعداك
خفف عناه ودونه السيف سلّه
إن جاك باده ضحكةٍ من محيّاك
وأظهر لمكنون الموده رضاً له
واترك رفيقٍ كلما غبت يشناك
ويخطي عليك بزلةٍ عقب زله
خله يتيه وخالق الكون يرعاك
وسلكٍ يعقدك فيه لازم تسلّه
ابعد عن اللي ما يودك ويهواك
انزح ديارك عن ديار المذله
وإن جاك مغرورٍ على العمر يبلاك
عميق ضرباتك تراها دواً له
رم المعزه لو تجي بين الإدراك
وعف الحياة اللي وراها مذلّه
واذكر ترى من يكتب السو يبراك
وراعي الحساني كاتبٍ مردفٍ له
يحصون ما سويت يالعبد بهواك
والكل منهم بالقلم مصغي له
دايم على الكتفين الأيمن ويسراك
وكل معه للي فعلته سجلّه
واحذرك لا تظهر سراير خفاياك
لعداك واحذر لا يجي فيك خلّه
ومن لا يورّد بالشدايد ضماياك
خلّه عسى وبل الحيا ما يعلّه
وراعي النمايم بعده عن دناياك
لازم توريه الجفا والممله
الناس عوجان المناطق تبلاّك
الحاقدين أهل القلوب المغلّه
ربك ليا منّه على الزين مشاك
حطوا بدربك هضبةٍ مستقلّه
يالعين شفت اليوم ذولا وذولاك
للشين عدّوا كل عيطاً مطلّه
يا مرشد البذال ما والله أنساك
إلا أن يزول طويق عن ماقفٍ له
دايم وهاجوسي من البعد ينصاك
صداقةٍ بالقلب يمّك تدلّه
تمكنت ماناشها كل دكّاك
يوم الوفاء في ساحتك مدهلٍ له
أقسمت لك بالله يا رشد ما أغلاك
محبةٍ لبست من البيض حلّه
عسى الردي يابو سعد من فداياك
من تاه يا مرشد عن الطيب خلّه
اليا انعقد قلبك ترى دواه وادواك
بعدك عن اللي ما يودك عزاً له
يعتن فكري كل ما اوحيت طرياك
يوم الوفاء عديت في مرقب له
عسى المنايا يالرشيدي تعداك
يضفي عليك مدبّر الكون ظلّه
الشاعر/ الأمير محمد بن أحمد السديري - رحمه الله -