صادق وكذاب

سو اللي براسك ولاتذكر أسباب
لاصرت بايعني توكل على الله
مابيني وبينك مشاريه وعتاب
شف دربك اللي جيت منه تدله
ماراح تغلبني لو الحب غلاب
من حضرتك عشان قلبي تذله
في ذمتي لجعلك عبره للأحباب
إلين الخل يتوب عن جرح خله
زلاتك اللي ما نفع فيها حساب
لاجيت أعددهن ثمانين زله
أحرجتني بين القرايب والأحباب
كن الجفا سيف بوجهي تسله
ماكنت اقصر فيك من كثر الإعجاب
يومك تساوي عندي الكون كله
كنت القريب وكلهم كانوا أغراب
حتى القمر لاغاب شفتك محله
رح واعتبرني واحد أذنب وتاب
ماني بثوب تلبسه ثم تمله
مايجتمع بالحب صادق وكذاب
رزقي على الله وأنت رزقك على الله