واهني القبر وتراب النثيله صار غمد السيف مصقول الشباتي

مشاعر رثاء في الشيخ ممدوح بن طلال بن غضبان بن رمال - رحمه الله وجعل مثواه الجنة -
مر عشر وعشر كني في مليله
ماقدرت استوعب غيابه بتاتي
اوجعن بالحيل ياربعي رحيله
وادري ان مثلي من أحبابه مياتي
مستعيف وطعم ريقي حنظليله
ومستعر بالكبد نار له سناتي
وصرت أشوفه كل يوم وكل ليله
والجدا من دمعها ياعين هاتي
لا انهرس ليلي يزود الهم كِيله
وتسرق الذكرى من من عيوني سباتي
وعبرتي تحشرجت وارزم مخِيله
غالتن مرارته باقصى لهاتي
راح ابومشعل عسى ربي وكيله
فارس الجاهات زيزوم الدهاتي
وانهزع متن من متون الغفيله
وانسهل عمودنا بالنايباتي
كان آمان لكل رجل بالقبيله
في وجوده مانهاب المعضلاتي
وام سنمان اخلجت يعول عويله
وجاوب القاعد وطوح بزفراتي
واستهلت بالبكا عين الرعيله
والمزون دموعهنه سايلاتي
كم سجين لاجله اخلوا عن سبيله
كان من دونه قفول مبهماتي
وكم عجوز دمعها يهمل هميله
من كبر همه ولاساعه تباتي
الولد محكوم واستعصى قبيله
مالها غيره وسبع من الخواتي
زجت الصيحه على راس الطويله
وين ابومشعل نظر عيني شفاتي
انتخى له بالعجل راع الكحيله
بالفعول وبالحظوظ المسملاتي
قال لامِنّا تتقينا فشيله
من يبين ومن يحل الكايداتي؟
واهني القبر وتراب النثيله
صار غمد السيف مصقول الشباتي
صارم من جملة سيوف صقيله
لا انثلم واحد طلع بعده عتاتي
ما كر ما بار زندك والفتيله
مركب مشدود واركب يا الزناتي
كل مااقفى شيخ جا شيخ بديله
ومن يعقب طيّب ماتقل ماتي
يالله انك ترحمه واكرم نزيله
واسكنه باعلى الجنان المورقاتي
ضيف عندك وانت تدري وش حصيله
ومحسنين الظن بك صدق ثباتي
والعوض باللي لهم قدر وفضيله
اخوته وعياله اللي له حضاتي
كل منهم صارم مافيه حيله
حر من حر غِياه مجوداتي
والله الهادي على الراي وجميله
والله العاصم من افعال الوشاتي
وعد ماطافوا وصلوا من نفيله
يارسول الله عليك ازكى صلاتي