اللغز محكور طرازه سميني والنار بالمحجان محد يشبه

كتب لغز الاسبوع الماضي الشاعر : عبدالله عبدالهادي القحطاني من الرياض والذي يقول :
لغز نبي حله من العارفيني
واللي مايسبح بالبحر لا يطبه
ياويش رجل تمسكه باليميني
من عقب ماهو عايش وسط خبه
في مامضى ضرورة يالفطيني
ولا ظنتي يدفيك لا جاء مهبه
اول وثاني حرف بالبيضتيني
وثالث وخامس كلنا مانحبه
ومع صعوبة اللغز رغم انه وارد بقوة الا ان هواة الالغاز لا يصعب عليهم ذلك :
اللغز يالقحطاني لغز ثميني
واظنه المحجان من وسط غبة
واللغز بالتوضيح حله يبيني
والجن يالقحطان محد يحبه
محمد ابو دحيم - البدائع
اللغز وارد في وضوح يقيني
ما ظن واحد من ربوعي يسبه
الحل محجان وشكله يبيني
ولا شرار الجن محد يحبه
علي الرشيد - رياض الخبراء
انا اشهد انك يالسنافي فطيني
لغزك جميل ولامن احد يسبه
محجان والمحجان وقته سنيني
ماعاد له عند الاجاويد نبه
خالد المرشود - الرياض
الصفحه اللي من سنين السنيني
من صغرنا ياهل الغطاوي نحبه
منها عرفنا اللغز يالفاطنيني
وابورجا عادي يحرر مصبه
واللغز هذا دوخن ياظنيني
والحل محجان كثير بخبه
عيد فريح الفاران - حايل
المح وسط البيض يالعارفيني
والجن لا من حل ياصعب طبه
واللغز محكور طرازه سميني
والنار بالمحجان محد يشبه
عبدالله عايد المفضلي - الرياض
عز الله انه جاب لغز سميني
ومن مثل هذا اللغز قلبي يحبه
مشكور يالبادع وحله يقيني
محجان وقته راح والكل كبه
سعود السليس - الرياض
وهذه الرمعة وان كانت غير صحيحة ولكنها طابقت الحل كثيرا الا في شيء واحد
ولكنك عندما تحلل اللغز تجد ان المحماس قريب من الحل في كون الول وثاني حرف موجود في البيضة وهو -مح- وثالث حرف وخامس حرف -مس- وهو ضرورة في مامضى لحمس القهوة
ولكن هل المحماس يؤتى به من الخبه وهل المحماس يمسك باليمين الا للاعسر وهم ندره
اما المحجان فجميع ماذكر باللغز مطابق تماما
بطب البحر وبالله ربي مستعيني
وماخاب من دعا الله وطلب ربه
حله المحماس لكن مايستكيني
كود البن حاضر ولا بد من شبه
محمد السعيد - جلاجل
لغز الاسبوع
انشدك عن بنت قديمة وسط بر
والبنت فيها زين وشموخ وعروق
اول وثاني حرف صبر على المر
وان ضم الاول صار للنفس معشوق
وخامس ورابع حرف هو ديدن الحر
وثالث ورابع حرف مع كل مخلوق
نستقبل الرمعات والحلول خلال أربعة أيام
من نشر اللغز على الإيميل:
rb-khozama@alriyadh.com