قَرْوٍ جمع بين الحضارة والآثار ما شفت أنا في ها الزمن مشبهٍ لّه

قَرْوٍ جمع بين الحضارة والآثار
ما شفت أنا في ها الزمن مشبهٍ لّه
بزبوزه مْركّب على الجال بأفكار
وش لون ها التفكير راعيه دلّه
هذي مغاسل نجد يا راعي الأشعار
قبل يجي البترول وتْصير فَلّه
محمد مقحم المقحم - الرياض
الشكر يا سليمان ع صوره ذِكيَّه
يا كثر ما تتعب خيال اللي يراها
الما وجوده يبقي الحقول حيّه
مع جهد فلاحٍ بتنظيمه رواها
صوره بسيطه تعطي الما بالسويّه
بالطين مصنوعه وجيد محتواها
سعود عائش الحربي - جدة
يالسنيدي وين هذا المكان؟
دلنا نبي نشوفه من قريب
في رصيفٍ كنه أيام الزمان
منظره واضح شكله غريب
حوض ما ناحتينه بالبنان
ناحته جدٍ على الدنيا غريب
من قديمٍ على وقت العنان
يوم سود اليالي والحريب
حمد عبدالله الوايلي - حوطة سدير
وجدي على وقتٍ مضى ما نسيناه
قفت به الأيام هي والحضاره
قَرْو الحجر في سالف الوقت شفناه
في طرف المسجد مجهز للطهاره
يا ما توضينا فيه والما منه شربناه
لا نادا المؤذن بالصلاة من المناره
ما راح ننسى القَرْو لو حنا فقدناه
وما راح ننسى الزير هو والغضاره
خالد بن ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد