أرسل جوابي والخزامى وفين ذا مهرجان يشمل الظل والشمس

كتب لغز الأسبوع الماضي للصفحة الشاعر حاتم عبدالله الشاهر من الرياض والذي يقول:
أنشدك عن رجل تحبه ملايين
رجل يلم الناس بالفعل والحس
أول ثلاث حروف ايه من الزين
وآخر ثلاث حروف شي من المس
وثاني وثالث حرف من بين قوسين
دون الفهد بالحجم وأكبر من البس
وكان الحل من الشعراء:
اللغز حلّه بَعْد تفكيرٍ يْبين
ولو هو بْبَعض التعابير مندسّ
المهرجان اللي من الحين إلى الحين
صرنا نشوفه، والخطَابة تبي قُسّ (1)
قُسّ: قُسُّ بن ساعدة الأيادي، خطيب العرب المشهور.
محمد مقحم المقحم - الرياض.
اللغز واضح ما يبي زود تبيين
يا مرحبا باللي حديثه لنا رمس
وأعطيك حله بوقته الحين
لا ما عرفته ترا خاطري عمس
المهرجان اللي له الناس عانين
هذا جوابه واضح كنه الشمس
حمد عبدالله الوايلي - حوطة سدير
حييت يا حاتم وربعك سعيدين
اللغز مليان وبصمت بالخمس
أرسل جوابي والخزامى وفين
ذا مهرجان يشمل الظل والشمس
علي الرشيد - رياض الخبراء
المهرجان الحل من اول و الحين
والفهد أظن أكبر شوي من البس
ألا يا ليت اللغز في يوم الاثنين
هذا جواب اللغز واليوم مثل أمس
محمد بن عبد الرحمن أبودحيم - البدايع
دوك الجواب اللي من الراس ذالحين
وأحل لغزك يابن شاهر مهو رمس
المهرجان اللي معه ناس لاهين
يصلح لناس تصفق الخمس بالخمس
رجا بن عادي - الرياض
يا مرحبا يا مسهلا فيك وأهلين
وأهلا هلا ما دار بجنوطه الجمس
واللغز أفكر فيه لي حول يومين
والمهرجان الحل جهرا مهو همس
عيسى الشلاحي - الرياض
يا أهل الخزامى عندنا حيل غالين
منذو زمن نقرا جديده مع الرمس
واللغز له فن ونظام وقوانين
والحل أظنه مهرجان كما الشمس
عبدالرحمن بن معيذر - الرياض
ما كل رجل فاهم بالقوانين
وما كل رجل يعرف اللغز والهمس
وقريت لغز شدني يا عزيزين
وأظن حله مهرجان بلا عمس
عبدالكريم حميد العازمي - الرياض
لغز الاسبوع
كتبه للصفحه محرر اللغز ويقول:
أنشدك عن رجل صعيب يا فهيم
وليا عكست اسمه تشوف الغشمره
سميّه اللي بالخلا دايم مقيم
بعض العرب لاجاه جته الثرثره
أول وثاني حرف جرح ما يضيم
وعن بعض توضيحه نسوق المعذره
نستقبل الحلول خلال «ثلاثة أيام»
من نشر اللغز على إيميل الصفحة:
rb-khozama@alriyadh.com