صوت الصورة

الحمسة لْها فن ولها مقاييس إلى ظهر فيها العرق فهي شفّي
يا زين حمس البن وسط المحاميس
أحط فيها الطبخة اللي تكفّي.
والباقي أخلّيه محفوظ في كيس
أخضر لباكر والزمان مْتقفّي.
الحمسة لْها فن ولها مقاييس
إلى ظهر فيها العرق فهي شفّي.
قرّب لها طاحونةٍ حسّها احسيس
قولي لها بالمدح يعجز يكفّي.
فوّح بدلّة وانبسط بالنواميس
تأثيرها ما هوب فيك مْتخفّي.
محمد مقحم المقحم - الرياض.
القهوه وسط المحماسه
على المجمار يحركها
من ذاقها طار عماسه
من حرها ما يفركها
جلسة(ن) فيها الوناسه
واللي حمسها يدركها
هذي هي كيفه واحساسه
من ذاقها ما يتركها
سليمان بن عبدالعزيز السنيدي
يازارع البن الطبيعي بخمسه
نبغى شرابه تحت ضوء الثريا
ياقالي البن انتبه عند حمسه
مابغاه محروقٍ ولا أبغاه نيا
دقه بنجرٍ يسمع الجار حسه
عساه للشرّاب ياجي هنيا
واللي يصب البن بالخير مسّه
باين عليه الجود بالناس حيا
محمد عبدالله الشهري- جبل اثرب
الطيب لاهل الطيب ياراعي الطيب
يامكرم الضيفان في كل حزه
يا فخرنا بك وانت راعي المواجيب
بالصوره اللي كل سعودي تعزه
البن بالمحماسه ومن تحتها اللواهيب
والهيل بالدله والذبيحه على رز مزه
تراثنا حافل ولو كثرت علينا العذاريب
وقولة هلا للضيف نعتبرها معزه
خالد بن ناصر المخيمر.روضة سدير
يازين شوف الكيف وطرق المعاميل
والبن في المحماس بادي شقاره
في صالي النار وبالك تحرقه حيل
خله على جال الضو يكفي حراره
يالنشمي الي فيك همت هل الخيل
وقرم على وجه المواقف شطاره
ياراعي الصوره ترى القلب له ميل
وتشوقه الجلسه على حل شاره
حمد عبدالله الوايلي . حوطة سدير
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد بعث بها سليمان السنيدي