الطيب وهبه مهو تدريس وكل يعوّد على طبعه

كتب بيت الأسبوع الماضي الشاعر رجا بن عادي والذي يقول:
الطيب وهبه مهو تدريس
وكل يعوّد على طبعه
وقد كان الصدى من الشعراء:
وإن كان حاول مع التمريس
الطيب كايد على ربعه
لا صار طبعه ما هو تكريس
متأصل فيه من نبعه
خله يدسم من التهريس
فاله قصير وله تبعه
حمد عبدالله الوايلي - حوطة سدير
الطِّيب يمنح مَع التأسيس
ويتم مِن ربنا وضْعِه
مَا هُو تِطِبِّع ولَا بالكِيس
يا بخْت مِن كان مِن رَبْعه
وان كان مُو بالفتى تغْرِيس
الكِل يرجَع إلى طبعِه
سعود عائش الحربي - جدة
الجود ما يقبل التلبيس
ما يقبل الزود عن وسعه
معروف مشيانه من التأسيس
كل يشوفه على وقعه
احذر تقرب دروب الهيس
ولا يغرك من اتبعه
علي الرشيد - رياض الخبراء
أخذ النصيحه وعليها قيس
لا يغرك الوقت والمتعة
كل شي يا قف على التأسيس
والكفو معروف في ربعه
ولا الردي مستشار ابليس
خايب وعايش بلا سمعه
عبدالله بن عبود السهلي - الجبيلة
من باللزم ما يفك الكيس
تنفاه الابعاد مع ربعه
والدرس ما يغير الخسيس
والماء يعود على نبعه
عنده تساوي النعم والبيس
مايميز الضان من ضبعه
عيسى الشلاحي - الرياض
الطيب دربه مهو للهيس
والوكر به نادر وتبعه
والذيب ماهو رفيق التيس
ولا يغرك البدي واللمعه
طبع الفتى يغلب التدليس
والجوع يرجع بعد شبعه
عيد فريح الفاران - حايل
بيت الأسبوع
كتبه للصفحه الشاعر صالح البشري من الفويلق ويقول :
يا مدعي بالكذب حكم ضميرك
دمرت بالبهتان سمعة شريفين
نستقبل صدى هذا البيت خلال أربعة أيام
من نشر البيت على إيميل الصفحة:
rb-khozama@alriyadh.com