يا زين شوف العشب سِفن الصحاري منظر طبيعي زال حزون وهموم

يا زين شوف العشب سِفن الصحاري
منظر طبيعي زال حزون.. وهموم
وجنب الدلال الصفر شبيت ناري
جلسة نشامى رجال ما فيهم رخوم
سعد السالم - الطائف
يا زين تصوير الخزامى بالألوان
صوره تذكرنا بوقت الربيعي
والبل ترعى والمواشي وقطعان
يا زين هالمنظر جماله طبيعي
معه الفرح يفرح معه كل إنسان
والسيل معه البرق يلمع لميعي
سليمان عبدالعزيز السنيدي - الرياض
محتار أنا يا ناس في صورتين
وضحى تشابه للقمر فالسما بان
ولا الزهور اللي بها شكل تلوين
أغصان في وسط المفالي لها شان
البر قولو يا عرب وينهو وين
بانصاه لو هو فايتٍ بعد حوران
محمد عبدالله الشهري - جبل اثرب
زِين البراري مخضره والمغاتير
مِع ناقةٍ وضحى جميله بها ترعى
مِن جابها دافع آلاف الدنانير
كِن محْمِيِ لها العشب والمرعى
كانت حياة الناس بالحرب والمسعى
وبقيت غلاوتها بوقت التياسير
ترعى بأمنٍ دون خوف او مغاوير
في موطنٍ به زان عيشٍ ومسعى
سعود عائش الحربي - جدة
هذا الربيع اللي له النفس في شوق
بين العشب بين النفل بين الأزهار
وشوف المغاتير اللي لها منزلٍ فوق
ف أعلى الضماير ساكنة ما لها جار
أنا هناي ومتعتي شوفة النوق
في وصفها تعجز حروفٍ وأشعار
سالم الدوسري - الرياض
وسط الخزامى شفت أزهار وورود
وإبلٍ لها في مهجة القلب مقدار
من عصرٍ مضا عصر الغزاوات وجدود
واليوم في خير البلد .. خير الأخيار
بشائر القحطاني - الرياض
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق