إنْ ما شبابك ذَب بك رِيع وحزوم وش تنتِظر لا قصَّر الجهد والشوف

كتب بيت الأسبوع الماضي للصفحة الشاعر سعود عائش الحربي من جدة والذي يقول:
إنْ ما شبابك ذَب بك رِيع وحزوم
وش تنتِظر لا قصَّر الجهد والشوف
وكان الصدى من الشعراء:
قولٍ صحيحٍ والجِدَلْ فِيهِ مَحْسُوم
وصَعْبٍ نِعَرِّفْ شيِّ للناسِ مَعْرُوف
ما دامتِ الصحّهْ ولا قُوّهِ تْدُوم
ما راحِ منْها ماضِيٍ غيرِ مخْلُوف
زَهْوِ الشبابِ يْبُورِ يومٍ بعَدْ يُوم
منْ لا قِطَفْ ورْدهْ لَحَقْ نفْسهِ حْسُوف
ياكِثْرِ منْ ماتَوْ قَبِلْ قُولِ مَرْحوم
مشْيٍ علىَ رَمْلٍ محَتْ رَسْمهِ شْعوف
ناصر جمعان آل عوض - وادي الدواسر
اغنم شبابك دامك اتنام وتقوم
واحفظ امورك لا يجي حولك الخوف
واختر من الصحبة شغاميم واقروم
والكل منهم بالمهمات معروف
العمر لا قفى فلا ينفع اللوم
اهَملت بالأول وعودت مكسوف
علي الرشيد - رياض الخبراء
عمر الفتى ما بين هازم ومهزوم
اما طلع باول شبابه كما وصوف
حر ٍ على الجزلات بسهوم وعّزوم
مع كل فج يبوج دار ٍ بها الخوف
وش يحتري لاصار شايب ومخزوم
مابين تقويس الظهر يابس اكتوف
مشعل بن صنت العصيمي/الخرج
لاتضيع اوقاتك تفاكير وهموم
الوقت فرصه ماخفا اليوم معروف
وخل التكاسل ولاانته اليوم ملزوم
واعرف ترى الدنيا بهاذيل وكلوف
اغنم شبابك قبل ماتصير مليوم
هذا زمان الجد ولايصيبك الخوف
محمد بن عبدالعزيز الخنيفر - أشيقر
ايامنا لازم تبي جهد وعزوم
تبي الصبر وصاحب الطيب موصوف
هذي هي الدنيا هموم مع غموم
فيها العنا وكثر الغثا وكثر الظروف
وترى الكسل ماهوب ينفع ولا النوم
شي نشوفه بينن وصار مالوف
ريان بن محمد الخنيفر
لافض فوك ياسعود شاعر وزيزوم
قول وفعل ما قلت ماني مكلوف
وهبة من الخالق معطى ومحروم
احدن يفوز بالجاه والاخر يسوف
صالح البشري - الرياض
كم واحد قبلك فتر من حيل وعزوم
وهو صليب الراي مايعرف الخوف
يوم الدهرجابه على الحل معزوم
ماهوب معزوم على اكل في الجوف
وحان الرحيل وودع العمر ملزوم
وترى الندم ماينفعك قول واحروف
واغنم زمانك دامك اليوم زيزوم
راجع حساباتك قبل لايف اللوف
حمد عبدالله الوايلي - حوطة سدير
بيت الأسبوع
مجاراة لبيت الأمير الشاعر محمد الأحمد السديري حول اختيار الصديق الذي في صداقته النجاة والبيت يقول:
من قارب الاجرب بالامراض يعديه
عدواه تسطي باللحم والعظامي
نستقبل صدى هذا البيت
خلال أربعة أيام من نشر البيت
على إيميل الصفحة:
rb-khozama@alriyadh.com