مكارم الأخلاق

يالآدمي ما تنفعك غير الاخلاق
مطيّة اخلاقك لاتطلق رسنها
إتبع صفات الانبياء واخْذ مالاق
واغنم حياتك والسنين امتحنها
وازن مابين الروح والجسم .. بعناق
شرع الله .. وْنفسك من العيب صنها
حسن الخُلُق يشرح لك الصدر لا ضاق
وْيجلب فرح نفسك ويبعد شجنها
صل من قطعْك وْلا تجازيه بفراق
وْساعد يتيمٍ وحدته يحتضنها
وابذل قصارى جهدك وْتشرق اشراق
شمسك .. وتجني غرْس جنّتْك منها
وْكفّ الأذى واحرص على بذل الارزاق
وْكن منبع الأخلاق واحكم وطنها
واصدق بهرجك لا هرجت مْن الاعماق
من شان سالفْتَك ماتدفع ثمنها
واصبر لو انّ الصبر ماعاد ينطاق
صبرك على الضيقه يرحّل ضعنها
واسعِد كئيبٍ محرقه همّه احراق
من ضيقةٍ في وسْط صدره سجنها
وافرِح حزينٍ للفرح حيل مشتاق
فرحتْه مبطي وهو لابس كفنها
واعدل وخلّ امانتَك نصْب الاحداق
وْتلقى حياتك عدلك اللي وزنها
والرجل لا من صار للخير سبّاق
مكارمه تتْحدّث الناس عنها
وْتُكتب بتاريخه على بيض الاوراق
وتخلّد اللي في حياته ضمنها
وإلى عفى عن كلّ ظالم وبوّاق
كنّه مابين الناس يامر وينهى
والآدمي ما تنفعه غير الاخلاق
والرابح اللي عاش فيها ومنها