الصبر حكمة

الشاعر حمود الجابري يخص قراء ( ملامح صبح ) بقصيدته ( الصبر حكمة ) والتي تحمل من النصح الشيء الكثير، ومع شكرنا له، ندعوكم لمشاركتنا قراءتها حيث يقول:
خل الزمن وظروف الايام تحتاس=لايصطفق في داخلك شي منها
لاتشكي همومك وضيقك على الناس=رزقك على اللي كل خلقه ضمنها
لا تبيح في سدك على كل مجلاس=تلقى السوالف بالمجاليس عنها
أصبر ترى بالصبر حكمه ونبراس=لاعمست الارياء يجود رسنها
للصبر حكمه والمواقيف مقياس=وشاور حكيمً حكمته مختزنها
يعطيك من در الهواجيس الالماس=من حكمته هرجك بصدره دفنها
تدرك مطاليبك وتبني لها ساس=ولا بد للعاقل يحصل ثمنها
وأرفع مقامك عن رديين الأجناس=لو يمدحونك باللقاء لا تمنها
لارحت حشو بالعراقيب الانجاس=ناسً على درب الردى شوم عنها
مامن وراهم بالزمن غير الافلاس=ناسً مشى طبع الردى في بدنها
أحرص على الطيب ترى الطيب نوماس=اللي ليامن قال هرجه وزنها
تأمن على أسرارك وترفعبه الراس=حتى حياته بالوفاء لك رهنها
ومع هبة الريح أنتهض مثل قرناس=حرر قيود الطيب والنفس صنها
ولو تصفي الدنيا لك أيام تنحاس=دنيا رديه لا يغرك زمنها
ماهمني فيها المظاهر والألباس=قلبي ليامن عاف حاجة ركنها