صوره تعبّر عن دروس ونصايح مضمونها واضح بليا إضافات

الوصل شوفوه بالرجل الاصيل
فوق ظهره شال أمّه يا سلام
من فعل مخلص وأمثاله قليل
ذا ومثيله له محبه .. واحترام
احرص احرص يافتى قبل الرحيل
لوالديك حقوق مع زود اهتمام
ناظر الصوره تراها لك دليل
الاجر تلقاه عند رب الانام
محمد عبدالعزيز الخنيفر - أشيقر
الله يجازي فاعل الخير بإحسان
ويضاعف الحسنه بعشر حسناتي
بهما فجاهد والدينك يا إنسان
وصيّة الخالق عظيم الصفاتي
مهما عطيت حقوقهم فيه نقصان
وما ظنتي توفيه طول الحياتي
احذر تضيّع برهم وين ما كان
وإياك تنطق أُفٌ .. والناهراتي
واخفض لهم بذلتك كل جنحان
اكسب رضاهم هو تراه النجاتي
صالح علي المبارك - حوطة سدير
صوره تعبّر عن دروس ونصايح
مضمونها واضح بليا إضافات
امك وابوك إرأف بهم وانت رايح
يجيك ماجاهم.. وذا الامر دينات
شف هالولد بمّه يسطر لوايح
يدرس بها الدارس افراد وجماعات
البر دين وغالب الدين جايح
دايم معلق فيك غدوه .. وروحات
اما يسدد من عيالك .. وطايح
والا تحسف .. عبرتك دوم آهات
عبدالكريم النغيمشي - لوذة
الوالدين أوصى بهم رب الأرباب
وبرهم وإكرامهم شيء مطلوب
الحاج شال أمه ومسعاه ما خاب
يبغى رضاها يتبع آيات وأسلوب
منظر يعزّ النفس ويثير الاعجاب
الأجر عند الله موثق ومكتوب
علي الرشيد - رياض الخبراء
صوره تعبر عن وفا وألف عنوان
فيها المعاني ثابته دون تعريف
وياما حلا حجٍ على بر واحسان
هذي البريره يا وجيه المراويف
على كتوفه شايل أمّه .. وشفقان
يرجي رضاها دون ملٍ وتكليف
ويبي ثواب الله مع خير وجنان
حقٍ فرضه الله من دون تحريف
حمد عبدالله الوايلي - حوطة سدير
البر يا أهل البر لا يرخص البر
بأمك وأبوك ان كانهم بالحياتي
اليوم تقدر وان مشى الوقت تكبر
وبكرا على الممشى تشيل العصاتي
من شال امّه يبشر بخير ويسر
وبكرا عياله تخدمه .. والبناتي
عبدالكريم بن خزيّم - البكيرية
للوالدين حقوق ماهي قليله
والبر واجب يالنشاما تعرفون
ماهو كثيرٍ فوق راسك تشيله
ياما من الخيرات والأجر تلقون
أمّك من اجلك ما تهنى بليله
تسهر طوال الليل وماتغمض عيون
وهذي رساله للرجال الاصيله
لأمّك وأبوك حقوق حذرا تغفلون
ريان محمد الخنيفر
أمٍ على اكتاف ابنه يشلّه
مشهد وفا مع بر من عمق الإيمان
المملكة جهودها بالأدلّه
من دون منّه .. واضحاتٍ للأعيان
حجكم مبرور .. والسعي كلّه
وسلامة العودة بخير للأوطان
سعود عائش الحربي - جدة
ياهني ذا الحاج محجج امّه
كذا المبرّه يا عرب والا بلاش
يوم الطفوله تذكر الام ضمّه
ومن لايرد الدين بالحال ماعاش
انا اشهد انه يدوّر الاجر لامّه
واللي يتذمر لاجلها اليوم غشاش
خليف فهيد الحربي - الرياض
صورة العدد (عدسة/ لمياء الرميح)
Your browser does not support the video tag.