ياجعلة اكتابك من الخير موسوم

قصيدة مرثيهة في والدي - رحمه الله -
ياالله يا المعبود فيك الرجاء دوم
ياواحداً فيه الظن يوم ماخاب
ترحم عزيز لي على القلب مرحوم
يسوى الليالي والحبايب والاصحاب
يابوي موتك شي مقدر ومقسوم
والموت حق وكل شي له أسباب
ياجعلة اكتابك من الخير موسوم
دام البنادم يوم يبعث له اكتاب
فيك دايم أحلم ومن نومي أقوم
عساي أشوفك صدق من طولة غياب
وينك يابو الطيبة عن عيوني اليوم
جاورت منهو اغلاء من كل الأقراب
ياتاج راس القوم يا وافي علوم
منك المراجل شلتها لوهي أهضاب
على يدك يامدرسة نهج وسلوم
علمتني معنى الكرم لو للاغراب
ياكنز يانادر يابو طبع معدوم
روحك معي لو لحفوا جسمك اتراب
كل ماتذكرتك واني منك محروم
بكيت دمعي دم والقلب منصاب
موتك قدر والموت كالرزق مقسوم
والله يصبر قلب من فرقتك ذاب
عسى المطر يسقي ترابك على الدوم
الين قبرك يزهر ورود وأعشاب
عساك يوم النشر للخلد مضموم
ويعوضك ربي بجنات وأطياب
عبدالرحمن الكريمي
Your browser does not support the video tag.