شِف صورة الشيبان باللِبْس يزهون في وقتهم لجل الرياضه نصيبي

مارد ذا الشيبان مشيٍ بمضمار
والجو بارد واضح من التكاميل
هذي الرياضة فايده كبار وصغار
من حبّها تلغي المرض والتحاليل
وكبيرهم من التعب حط معيار
بعصاه ينبه سابقه للتماهيل
وان طعتني يا عم وردك والاذكار
احرص عليها في المشي صبح او ليل
سعود عبدالعزيز الهزاع - نعام
عصاك يا شايب تراها خطيره
بها تعرقل كل من سار حولك
كانه مسابق لا توقف مسيره
وكانه تمشى فالتزم سلم أصولك
لملاطف الرفقة معاني كثيره
لا تسمع العدوان لو صفقوا لك
علي الرشيد - رياض الخبراء
أحدٍ شبابِ وْهمته دُونِ في دون
وأحْدٍ يشيب وهمته ما تشيبي
العزم ما وقف على سنٍّ أو لون
منْ لهْ إرادهْ يستهين الصعيبي
مادمت موجودٍ وعايش بها الكون
ارفع طموحك قبل شمسك تغيبي
كم أمرٍ مْحلل وبالشرع مسنون
بعض البشر عَدّه غرِيبٍ وعيبي
شِف صورة الشيبان باللِبْس يزهون
في وقتهم لجل الرياضه نصيبي
ناصر جمعان آل عوض - وادي الدواسر
ما فكروا بالعمر نعم النشاما
وزادوا نشاطٍ ذي سلوم الرجاجيل
تلقى العمر فوق الثمانين عاما
والكل منهم مكملٍ زين تكميل
لكل واحد شكر وايضا احتراما
ما فكروا باللي كثير التقاويل
ونصيحةٍ للبعض وايضا ملاما
سيروا على نهج الرجال الحلاحيل
محمد عبدالعزيز الخنيفر - أشيقر
تلعب رياضه واضحه في محيّاك
مبسوط ما عندك من اللهم طاري
وصاحبك متعنز على الكتف ينخاك
تركض على المضمار وقت العصاري
تكفى ترفق خل ممشاي ممشاك
واحذر تقدم وابتعد عن مساري
خالد ناصر المخيمر - روضة سدير
خمسه من الشيبان صفوا طوابير
صفوا على المضمار فالخط يمشون
في ملعب الكوره وعند الجماهير
لبسوا ملابسهم ويمشون بالهون
يمارسون الجري من دون تقصير
وفضل الرياضه كلكم عنه تدرون
صحة وقوّه للبدن زود تنوير
علم بها ناسٍ على الدوم ينسون
وما فيه فرقٍ بين شيبان وصغير
قم واستعن بالله ثم اطلب العون
حمد عبدالله الوايلي - حوطة سدير
لا يسبقك يا ذيب.. شدّه بقوه
الجايزه حلوه وشكله نصيبك
كل الجوايز حزتها يا فتوه
من شبتك لليوم شفها بجيبك
مير الحكم صوبك كثير المروه
ماوقفك واعطاك كرتٍ يعيبك
رجليك تركض والعمر تم توه
وسط القبر وحده ووحده تجيبك
عبدالكريم النغيمشي - لوذة
هذي الرياضه وافهموا لا تغفلون
من لا يمارسها ترى اليوم غلطان
وهذا الفعل مطلوب وانتم تعرفون
سيروا على نهج النشاما والاخوان
خلك مع اللي بالميادين يمشون
النوم خل النوم لا تصير كسلان
هذي نصيحه وافهموا العلم تكفون
فرصه ثمينه خلها بكل ميدان
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد (عدسة / محمد السويح)