صوت الصورة

حول من الطفه على الوجه وقف
ما هو شطاره بس ربك كريمي
هوايتك بالجيب ماجت على الشف
ﻻ تنطح عروق الرمل يا غشيمي
ما كل بيضٍ شحمه وانت اعرف
وما كل من شقلب بيطلع سليمي
سعود بن عبدالعزيز الهزاع - نعام
جيب الربع مقلوب واقف على الراس
يللي اتطّعس وين راحت شجاعتك
لا يخدعك تصفيق جاهل من الناس
الى انعثرت او طحت بالهرج لامتك
كانك حكيم أوْ تنقل اشعور واحساس
التهلكه خطرِه وفيها نهايتك
فهد بن عقيل الطويان - بريدة
متهور بالحيل والجيب مرفوع
هذا العمل مرفوض بالشرع والدين
كم واحد مثله تهور ومصروع
بعض الشباب اليوم مثل المساكين
احساسه الغايب وعاصي عن الطوع
احذر يطيح الجيب فوق العلابين
عبد المحسن محمد المحيسن - رياض الخبراء
جيب الربع مهوي على الوجه مدفون
يستعرض المسكين جاهل مصيره
قصده تمشي والربع معه يتمشون
وسط النفود وفيه اماكن خطيره
مدري تهور او على الرمل مفتون
وين الفزع حتى يكمل مسيره
حمد عبدالله الوايلي - حوطة سدير
ابعد عن الاخطار والجيب خله
تراك مخطي ترفعه بالأ يادي
يبي لكم ونش يعدل محله
سلامتك أول ورب العبادي
هذي الصحاري بين نزلة وطله
لا للمخاطر خل عنك التمادي
عثمان ابراهيم الرشيد - الرياض
هذا هو التطعيس وما أكثر بلاويه
فعايل يا ناس والله جريمة
وهذا الخطر شفناه يا كيف يمشيه
بدايته مسرور والنهاية أليمة
قولوا لولي الأمر يفطن لغاليه
والحرص واجب مع وجود العزيمة
ريان محمد الخنيفر - الرياض
لا تخاطر بنفسك خل عنك الطعوس
يا اللي تخاطر في هباة الطعوسي
مخاطره لا بد تدفع ثمنها
تدْمر بجيب الربع بدي او تروسي
و نفس عرضه للشلل في بدنها
اسمع كلامي وستفد من دروسي
دوَّر هوايه غير واتعيض عنها
الشعر والشيلات طب النفوسي
وإلا الربابه تطربك في لحنها
احمد السمحان - الزلفي
نتايج التطعيس مثل النعامة
يدس راسه وباقي الجسم بين
غنّي على موالهم ياحمامة
ابيتكي للجيب ماهوب هين
ضحكت فرح والحين ضحكة ندامة
ياعاشق التطعيس اجلس تلين
شجعان بن سعود المقاطي - الرياض
ذي تالية لعبكم ياعيال
جويبكم طاح مركازي
عميان ماشفتو الدركال
والا الولد داس للقازي
يارب تستر على الاجيال
من فكرهم كان ماجازي
عبدالكريم النغيمشي - لوذه
يا والله اللي طولت وقفت الجيب
خذا سنين واقفن ما تعدى
ما يسمع الا فالخلا عويت الذيب
نعم الخوي في ماضين له يعدى
خويه يعشيه حرش العراقيب
اما تعشا معه ولا تغدى
لا يوجد ارسالن ولابه مكاتيب
يزم السراب ولا نضر فيه صدى
غنام مسعود القريني - نعام
من يشجعك ضايع وأنت مثله غشيم
الحذر والحذر لا تروح النفوس
ذي سلوم خطيرة وانتبه يا سقيم
خلفك أمك وأبوك دايم في هجوس
لأجلك القلب يخفق وحبهم لك عظيم
محمد عبدالعزيز الخنيفر
الجيب لو يكون دفعه رباعي
ما قدر الخلاق لازم يصيري
ما كان سواقه طيل الطعس واعي
مير المقدر فوق ذهن البصيري
مير لا صار التعاون جماعي
ياكم صعايب منتهاها يسيري
مع ما حدث فالرمل شوفه متاعي
مجلاس(ن) أو سج الرجل بالمسيري
سعود عائش الحربي - القاهرة
صورة العدد
نرحب بمشاركاتكم الشعرية وما تلتقطه عدساتكم من الصور الهادفة والطريفة..
على إيميل الخزامى:
rb-khozama@alriyadh.com
أو الفاكس رقم: 0114871070