مملكتنا مهبط الإسلام بالعز معموره

يا وطنا دام عزك تحت حكم أخوان نوره
لاتهمك شلة التخريب تخسا من عصابه
الوطن دونه رجال تلطم العايل جسوره
الوطن نفداه بأغلى شي ونقبل ترابه
دولة اللي سطوته منها العدو يلقى ثبوره
دونها ليث تهابه أُسد وتهابه أذيابه
الوطن سلمان دونه من طمع يقطع شبوره
الوطن سلمان دولة دونها ليث ولابه
ودونها اللي لاختلف شور وشور يصيب شوره
دونها محمد ولد سلمان ليث يقتدابه
ودونها الشعب السعودي متحد في كل أموره
عزوة القايد وجنده عزوةٍ له لا اعتزابه
شلة التخريب شله فاسده شلة بزوره
مالها طب يكون السيف الأملح والحرابه
يا خبول غرّها الشيطان وطغاها غروره
الوطن دونه نقطع روس ونحلق شنابه
الوعد لا قام كلٍ يلعن الثاني وشوره
الوعد لا قام كلٍ يقرض ابهامه بنابه
ما دروا وش لون وحدها البطل وش كان دوره
ما دروا وش لون كانت كانت سباع وغابه
ما دروا وش لون وحدها وخلاها اسطوره
ما دروا كم كانوا رجاله وكم كانت ركابه
ما دروا وش كان زاده وش عشاه وش فطوره
ما دروا وش كان يلبس ما دروا وشهو زهابه
مملكتنا مهبط الإسلام بالعز معموره
ديرةٍ فيها يقام الشرع ويحكم كتابه
كلنا نفدا الوطن في كل شي وبأي صوره
العمر دون الوطن يرخص ولا نحسب حسابه